L’Academia recláma-y al rector una edición billingüe de los Estatutos de la Universidá

09 setiembre 23:18 2004 Imprimir

Na Universidá ta “casi too por facer” na promoción del asturianu; “malpenes ta la secha abierta”. Por esa razón y con esi argumentu, la presidenta de L’Academia de la Llingua, Ana Cano, reclamó-y esta tarde al rector, Juan Vázquez, una edición billingüe -y non estremada- de los Estatutos de la Universidá. El rector retruca que na entidá “tán faciéndose coses” pola llingua asturiana.

La demanda de Cano, que pidió espresamente un volume estatutariu únicu qu’incluya les versiones n’asturianu y castellán y no ediciones separtaes de dambes versiones, como planea la Universidá, completóse cola reivindicación de que la entidá universitaria emplegue con mayor profusión l’asturianu na retulación, nos sos documentos y nes sos publicaciones, yá que, sostién la presidenta de L’Academia, la comunidá universitaria amuesa “sensibilidá” p’hacia l’usu de la llingua asturiana.

Sentáu a escasos centímetros de Cano, el rector, que presidía nel Aula Magna de la Universidá la entrega de diplomes a los 150 alumnos de los XXII Cursos de Branu de L’Academia -tres d’ellos acoyíos al programa d’Estensión Universitaria-, respondió que la Universidá “ta faciendo coses pol asturianu, que tien que formar parte d’ella” y asoleyó como argumentu la prósima edición de los estatutos en llingua asturiana, que na so opinión supón un simbólicu “gran pasu alantre”.

Juan Vázquez, que comprometió la so presencia na inaguración de la prósima edición de los Cursos de Branu, xustificó amás el so argumentu na “consolidación” del títulu propiu que la Universidá ufierta en Llingua Asturiana y felicitóse del doble valir de los monográficos cellebraos en Santantolín d’Ibias na primer quincena d’agostu, porque, afirmó, “tuvieron un elementu d’aprendizaxe, pero tamién de convivencia”.

Más d’un cientu d’alumnos corrompinaron l’Aula Magna pa recibir los sos diplomes, correspondientes a seis cursos: ún elemental y otru avanzáu de Llingua Asturiana, ún de torna al asturianu, ún de patrimoniu, un quintu d’ecoloxía y, a la fin, un cursu de capacitación en gallego-asturiano. Al actu asistieron, amás de Cano y Vázquez, la vicerrectora d’Estensión Universitaria, Paz Andrés, y el director de los cursos, l’académicu Xosé Antón González Riaño.

  Categories:
Loading Facebook Comments ...