Portada Sociedá L’Academia propón entamar un gran pautu pola llingua

L’Academia propón entamar un gran pautu pola llingua

by asturnet

La presidenta de l’Academia de la Llingua Asturiana, Ana Cano González, aprovechó el so discursu institucional del Día les Lletres pa proponer un gran pautu con implicación de tolos axentes sociales de la nuestra comunidá pal afitamientu d’una política xeneral comprometía cola llingua y la cultura asturianes en toles estayes de la vida pública. Cano criticó severamente les estratexes de promoción del asturianu desenvueltes pol Gobiernu’l Principáu y recalcó la necesidá de reconocer dafechu el calter oficial del asturianu nel Estatutu.

Vistida col traxe tradicional del Occidente, la presidenta de la institución llingüística, tres acoyer a los nuevos académicos: Marta Mori y Xoaquín Iglesias, repasó la situación de la llingua asturiana dende l’últimu Día de les Lletres. Resaltó los avances positivos que significaran fechos como la inscripción nel Rexistru Mercantil d’una empresa cola documentación presentada namás na nuestra llingua, el conveniu recién soscritu ente’l Conceyu d’Uviéu y l’Academia, y congracióse del premiu al meyor cantar n’asturianu recibíu pol músicu Chus Pedro Fernández. Darréu, Ana Cano, foi enumerando les principales dificultaes coles que se vieno atopando l’asturianu en diferentes estayes sociales, faciendo una remembranza específica a los problemes en tolos niveles de la enseñanza. Respective a les estorbises puestes a la titulación de Filoloxía Asturiana, la presidenta de l’Academia afirmó que “nun ye en Madrid onde tán los que más s’oponen, tan equí, n’Asturies” y llamentó “les vegaes nes que m’atopé sola, dafechu sola defendiendo la titulación ensin recibir dalu respaldu polos qu’habíen dalu dende Asturies”.

Les acciones entamaes pola Conseyería de Cultura en materia llingüística foron sobremanera criticaes y refugaes por Cano nel so discursu institucional: “falen de planes de normalización, pero nun hai normalización posible ensin la reconocencia de la oficialidá y esa reconocencia nun apaez per dayures el nomáu Plan de Normalización Social”. Pa la presidenta de la másima institución llingüística asturiana les cifres presupuestaries que se contemplen pa executar les diverses acciones del Plan de Cultura “nun se correspuenden cola realidá, ye una engañifa dicir que s’aumenten eses dotaciones coles cifres que se ficieron públiques”. Un capítulu especial meritó l’enfrentamientu que caltién l’Academia cola Conseyería de Cultura a cuentu de la Xunta Asesora de Toponimia: “talo denunciémos na presentación del Mapa Toponímicu apocayá, hai un tentu de querer suplantar les funciones asignaes llegalmente a l’Academia y de querer nega-y l’autoridá llingüística que-y ufierta la Llei d’Academies del Principáu, y toles disposiciones esistentes al respective”.

En repitíes ocasiones Ana Cano recalcó la necesidá irrefugable de que la prósima reforma estatutaria recueya la cooficialidá

pa la llingua asturiana y pal gallegu-asturianu, encamentando a los partíos políticos representaos na Xunta Xeneral a “facer de só un deséu de la sociedá asturiana que reflexen toes les encuestes”. El platu fuerte del discursu de les Lletres dexólu Ana Cano pa la parte final de la so intervención y consistió na propuesta entamada pola Academia de la Llingua pa consiguir “un gran pautu social, a semeyanza d’otros ya fechos” nel que tolos axentes públicos d’Asturies soscribieran un compromisu materializable pa la normalización del asturianu en tolos niveles de la sociedá, l’administración y la enseñanza. Esti alcuerdu espardiríase tamién a la promoción y caltenimientu de la cultura asturiana en tolos ámbitos sociales. Ana Cano, ofrecióse personalmente, na so calidá de presidenta de la másima institución llingüística d’Asturies, pa facer el papel de “moderadora” si asina lo consideraran los axentes implicaos nesi futuru pautu pola llingua y la cultura del país.

La propuesta de l’Academia pa liderar un gran pautu social pa la supervivencia y normalización de los elementos cimeros de la identidá cultural asturiana yera la sorpresa del discursu institucional de les Lletres que s’esperaba énte les estremaes situaciones conflictives que tien protagonizao esta institución, como garante de los drechos llingüísticos de los asturianos, especialmente coles autoridaes culturales del executivu asturianu. Enantes, l’Academia, aconceyada en xunta pública estraordinaria acoyera a los sos nuevos miembros: Xoaquín Iglesias, como académicu de númberu, y Marta Mori, como académica correspondiente. Iglesias nel so discursu d’ingresu na institución esplayóse alrodiu los problemes principales colos que s’enfrenta la llingua asturiana anguañu, sobretoo los que cinquen al mundu de la enseñanza. Mori, pel so llau, quiso centrar el so discursu nuna reflesión en defensa del “amestao”, como forma de pervivencia del idioma n’estayes de la sociedá asturiana onde la nuestra llingua fuera desplazada pol castellanu: “Yo nun provengo del mundu rural, criéme nun ambiente urbanu y amecigayáu como’l de los barrios de Xixón onde l’amestáu yera la fala corriente”.

L’actu de les Lletres cuntó cola presencia del gaiteru José Manuel Tejedor p’abrir y pesllar la xunta pública de l’Academia, y acabante’l discursu institucional d’Ana Cano, los periodistes Sonia Avellaneda y Próspero Morán, vistíos de rigor col traxe tradicional, dieron llectura a dellos de los poemes espublizaos nel númberu monográficu de la revista “Lletres asturianes”, dedicáu añalmente a los creadores na nuestra llingua. L’actuación del grupu Lliberdón, a la que se xuntaron Xune de Dixebra y el cantaor Horacio Huerta, punxo remate al actu del Campoamor, que remató colos sones del “Asturies patria quería”, interpretaos pol gaiteru Tejedor y conseñes en favor de la oficialidá pol numberosu públicu qu’abarrotaba’l coliséu uvieín.

Tamién te podria gustar