Portada Comunicación L’Academia de la Llingua pide la dimisión de Virgili na RTPA

L’Academia de la Llingua pide la dimisión de Virgili na RTPA

by redacción asturnews

L’Academia de la Llingua Asturiana espublizó esti martes un duru comunicáu pidiendo la dimisión del director de la RTPA y asoleyando que “mentanto Antonio Virgili seya Direutor la llingua asturiana nun tendrá espacios de dignificación al traviés del so usu normal n’espacios informativos”.

Pero l’ALLA tamién quier unviar a la sociedá un mensax inequívocu: “Antonio Virgili nun ye la persona indicada pa dirixir la televisión pública asturiana. Nun ye posible que la so actuación condicione la normalización llingüística y l’esfuerzu de munches persones enfotaes na recuperación del asturianu”.

Pa desplicar la so postura l’Academia esclaria que “quiciabes el so papel y determín encaxe na empresa privada pero, de nengún mou, nuna televisión con vocación pública y asturiana. Darréu de lo anterior, l’Academia de la Llingua Asturiana pide la dimisión inmediata de D. Antonio Virgili y da anuncia de que treslladará esta petición a la opinión pública asturiana, a los estremaos axentes sociales y a los grupos parllamentarios allugaos na Xunta Xeneral del Principáu d’Asturies”.

El presidente de l’Academia de la Llingua Asturiana, Xosé Antón González Riaño, ufiertó esti martes una rueda de prensa na so see d’Uviéu pa reclamar amás qu’unu de los informativos diarios de la TPA usara l’asturianu. L’Academia, esplicó, lleva años calteniendo contactos col ente públicu pa tratar d’ampliar la visibilidá del asturianu na televisión pública. «La resultancia d’estes conversaciones siempres foi frustrante» según González Riaño, quien criticó l’actitú d’ntonio Virgili nesti sen. Les palabres del presidnete de l’Academia nun almitíen duldes: “Tres un últimu alcuentru en xunu, comunicósenos que’l compromisu de la RTPA quedaba reflexáu en programes como ‘Asturianaes’, ‘De folixa en folixa’, ‘Guía chigrín’ o la retresmisión de la misa na cueva de San Pedrín, ente otros programes, daqué que, anque ta perbién, quédase llueñe de los pidimientos de l’Academia de la Llingua”. Estos programes de calter antropolóxicu afonden nun modelu marxinador de la llingua dende un puntu de vista social y arrequexenla na fastera de lo rural, como siempres se punxera de manifiesto ente tolos especialistes nel ámbitu audiovisual y nel de les llingües minorizaes.

Tamién te podria gustar