L’Academia de la Llingua Asturiana tresllada la so felicitación al Gobiernu del Principáu pol espediente d’Uviéu

by redacción asturnews | marzo 14, 2019 12:12 pm

L’Academia de la Llingua Asturiana tresmite al Gobiernu del Principáu d’Asturies la so felicitación más candial pola aprobación, na xunta celebrada güei miércoles, del espediente toponímicu del Conceyu d’Uviéu (xunto colos de los conceyos de Cuaña y d’Onís), onde se da calter oficial a les sos formes toponímiques tradicionales.

El Conseyu de Gobiernu del Principáu daba’l preste d’esta miente al determín tomáu pol Plenu del Conceyu d’Uviéu del 18 d’abril de 2018, que cuntó colos votos favoratibles del PSOE, Izquierda Xunida y Somos, que conformen la mayoría de gobiernu.

Con estos tres espedientes aprobaos güei son yá 64 los conceyos que ven oficializada la so toponimia tradicional, conformando estos procesos un pasu perimportante pa la normalización de la llingua asturiana. Sicasí, l’Academia entiende que tien un valir especialmente simbólicu’l fechu de dar el preste al espediente del Conceyu onde s’asitia la capital del Principáu y asina-y lo quier tresmitir al Gobiernu asturianu.

Source URL: http://asturnews.com/lacademia-de-la-llingua-asturiana-tresllada-la-so-felicitacion-al-gobiernu-del-principau-pol-espediente-duvieu/