Portada Sociedá L’Academia da a conocer mañana los resultaos algamaos pola so propuesta d’Alcuerdu Social

L’Academia da a conocer mañana los resultaos algamaos pola so propuesta d’Alcuerdu Social

by asturnet

L’Academia de la Llingua Asturiana, talo prometiera al iniciu de los primeros contactos con partíos, axentes sociales ya instituciones pa da-yos a conocer la so propuesta d’Alcuerdu Políticu y Social, va treslladar a la opinión pública los resultaos d’esos alcuentros y la respuesta algamada nellos a la so propuesta. La institución llingüística va dar mañana una rueda de prensa na que desvele l’acoyida recibida al Pautu pola Llingua y la Cultura Asturianes.

La propuesta de l’Academia llanzóla la so presidenta Ana Cano nel discursu institucional del últimu Día de les Lletres y articúlase alrodiu de cinco puntos: reconocimientu del asturianu como llingua co-oficial nel Estatutu d’Autonomía d’Asturies;afitamientu de los conteníos de la normalización y plazos na so puesta en práutica;pautu presupuestariu, conseñando’l mínimu necesariu pa facer vidable y efeutivu l’usu social de la llingua;dignificación, recuperación y divulgación de la cultura asturiana (folklor, arte, historia, etnografía, música…) nel ámbitu educativu; y l’inxerimientu de l’Antropoloxía Cultural Asturiana, nel nivel que correspuenda, dientro de la Universidá d’Uviéu.

Dende la difusión de la so propuesta el Día de les Lletres, l’Academia escomenzó la so ronda d’alcuentros con partíos políticos, sindicatos, asociaciones culturales ya instituciones pa da-yos a conocer el conteníu de los puntos mínimos d’esi Pautu pola Llingua y la Cultura Asturianes. Agora la institución va treslladar a la opinión pública los resultaos d’esos aconceyamientos y l’acoyida a la so propuesta.

Tamién te podria gustar