Portada Comunicación L’Academia celebró nel Filarmónica’l XLIII Día de les Lletres Asturianes

L’Academia celebró nel Filarmónica’l XLIII Día de les Lletres Asturianes

by redacción asturnews

El presidente de l’Academia de la Llingua Asturiana, Xosé Antón González Riañu, quixo ser claru nel actu institucional celebráu ayeri nel Teatru Filarmónica d’Uviéu: “Nun se llogró la oficialidá. Sabello qu’ello representa de sensación de fracasu y de perda d’una oportunidá hestórica. Pero nun pue xenerar, de negún xeitu, una frustración que lleve al desánimu coleutivu y la demovilización”. Un llamamientu que tuvo ecu tamién nes intervenciones de los dos nuevos académicos de la institución.

Los protagonistes d’esti 43 Día de les Lletres Asturianes, que se celebraba per primera vegada nel Teatru Filarmónica y na mañana del primer viernes de mayu, en llugar de pela tarde como yera vezu primero la pandemia, yeren Lisardo Lombardía Yenes, nuevu Académicu d’honor, presidente de la Fundación Belenos y ex director del Festival Intercélticu de Lorient, ya Inaciu Galán y González, nuevu académicu de númberu, doctor pola Universidá d’Uviéu, profesor, periodista y fundador de l’asociación Iniciativa pol Asturianu. Y dos, como’l Presidente de l’Academia, tuvieron  pallabres crítiques pa col Gobiernu  y los grupos de la oposición.

Lisardo Lombardía foi’l primeru en ser críticu y claru: “La oficialidá diba nel contratu ellectoral del nuevu presidente del Principáu, al que yo quixi creer. Pero non, polu que paez hai que siguir esperáu. Otra vuelta más atopraon la esculpia perfeuta. Una nueva versión de lo de siempres: despreciu y autoodiu”. Emocionándose en delles ocasiones, tuvo una crítica fonda pa los que “echen les cuentes de la vieya del impuestu de sucesiones y prefieren marafundiar al cambiu’l tesoru de la nuesa heriedu cultural” y pa los que “a pesar del billingüismu cordial que pedriquen pa otres llingües, nun son a algamar l’altor de mires cuando se trata de la fala d’Asturies”, pa los qu’inclusive “tracamundien tramposamente territorios yá hestoria y anuncien en salvar la vieya nación imperial con una guerra preventiva contra l’asturianu”…

El director del Festival Intercélticu de Lorient a lo llargo de 14 años provocó delles vegaes los aplausos del públicu con un discursu nel que fizo alcordanza de los  “50 años de militancia paciente, de llucha argumentada y democrática”, alvirtiendo sobro la oficialidá que  “si esta oportunidá se dexa pasar, si arrenunciase a lo prometío, si l’Estatutu nun se refórma cola reconocencia oficial d eles nueses llingues, los nomes de los culpables que lo torgaron va haber que los grabar nun requexu gafientu de la memoria. Porque nun ye tolerable, y porque ta en xuegu amás el futuru d’Asturies”.

Inaciu Galán foi pela so parte emitivu al reconocer que yera’l primer académicu nacíu dempués de la fundación de l’Academia de la Llingua Asturiana en 1980, lo que “ye síntoma del so afitamientu y de la continuidá xeneracional trés cuatro décades”. Galán pidió al altu la lleva nun dexar ganar a los intolerantes convencíu de que lo qu’asocede n’Asturies “ye inesplicable nuna democracia europea. Ye’l momentu de correxilo”.

Como afitare nel so discursu institucional el presidente de l’Academia, Xosé Antón González Riaño, “festexamos esti 43 Día de les Lletres Asturianes y facémoslo nuna situación de cuasi normalidá, pero col procuru de saber que los efeutos de la pandemia, magar qu’amenorgaos, siguen ehí y que, darréu d’ello, inda tenemos que poner lo meyor de nueso, siguiendo’l conseyu de les autoridades sanitaries, pa llograr desaniciar dafechu una gafura que lleva enartando dalgo de nós, tolos díes, dende va más de dos años. Nesti sen, quiximos facer un actu cenciellu, anque col altor formal qu’un Día de les Lletres Asturianes merez”.

L’actua abriolu y pesllolu Xuacu Amieva a la gaita  y cuntó cola actuación del grupu de punk rock Misiva, qu’amosó los diez años que lleven d’esperiencia al llombu con un prestosu apueste por una recreación de la música de só, rockera y propositiva, con un un conciertu acústicu prepráu especialmente pala ocasión.

 

Tamién te podria gustar