L’Academia celebra’l Día de les Lletres nel Aula Magna

Esti vienres, día 2 d’ochobre, a les 12 hores, nel Aula Magna del Edificiu Históricu de la Universidá d’Uviéu, va celebrase’l 41 Día de les Lletres Asturianes, que quedare aplazáu na primavera por mor de la situación sanitaria. Nesti actu, en Xunta Estraordinaria, daráse acoyida al nuevu Académicu Correspondiente D. Pablo Rodríguez Medina y entregaráse’l II Premiu Nacional de Lliteratura a D. Xuan Xosé Sánchez Vicente.
El currículu lliterariu de Pablo Rodríguez Medina, nel primer nivel de les lletres asturianes, ta compuestu d’obres de gran valir nos tres grandes xéneros, lo que-y fixo collechar bien de premios del mayor prestixu, igual en narrativa, qu’en poesía y en teatru. Amás del so llabor creativu, l’ALLA quixo sorrayar la importancia de la so contribución pedagóxica, que vien exercitando nel ámbitu regláu como profesor funcionariu de Secundaria y tamién como docente, dende cuantayá, de la Universidá Asturiana de Branu.

La trayectoria intelectual y lliteraria de Xuan Xosé Sánchez Vicente conviértenlu nun referente y nun de los mayores activos de la lliteratura asturiana. Amás de cultivar con aciertu tolos xéneros (poesía, narrativa, teatru, ensayu), abrió caminos nuevos pa la llingua a partir d’un fondu conocimientu y respetu pola tradición, que foi de los primeros n’estudiar y asoleyar. Figura clave del canon lliterariu asturianu, tamién resulten indispensables les sos contribuciones crítiques a la hora d’establecer y consolidar esi mesmu canon.

Esta Xunta Estraordinaria de l’Academia de la Llingua Asturiana finará col discursu institucional del Presidente, D. Xosé Antón González Riaño nel que, acordies cola actualidá sanitaria y socio-política, va facese una reflexón fonda sobre’l presente y el futuru de la llingua asturiana.Pa esta edición del Día de les Lletres Asturianes ta confirmada la presencia de les máximes autoridaes en representación de los ámbitos académicu, cultural, políticu y sindical d’Asturies y ta programada la retresmisión en streaming gracies al Serviciu d’Audiovisuales de la Universidá d’Uviéu. La RTPA tamién va facer retresmisión en direuto de la sesión académica.

Nel actu, presentáu por Sonia Avellaneda y con entamu y pieslle musical a cargu del gaiteru César Gracia, va asoleyase’l númberu 36 de la revista Lliteratura y el llibru Premiu Nacional de Lliteratura Asturiana. Xuan Xosé Sánchez Vicente, que recueye una esbilla de la obra lliteraria del autor y Académicu xixonés.