Portada Sociedá L’Academia celebra esti vienres el 40 Día de les Lletres Asturianes

L’Academia celebra esti vienres el 40 Día de les Lletres Asturianes

by redacción asturnews

Esti vienres, día 3 de mayu, a les 20,30 hores, nel Teatru Campoamor d’Uviéu, va celebrase’l 40 Día de les Lletres Asturianes. Nesti actu, en Xunta Estraordinaria, daráse acoyida a los dos nuevos académicos correspondientes de la Institución D. Pablo Texón Castañón y D. Alberto Fernández Costales.

L’actu, presentáu por Sonia Avellaneda y Próspero Morán, cuntará con un entamu musical a cargu del cordionista Marcos García Alonso y tendrá como pieslle l’actuación musical del gaiteru asturianu Hevia, que fadrá una esbilla de temes del so llargu y exitosu repertoriu.

Tres del entamu musical a la gaita darase acoyida a los nuevos  académicos correspondientes de la Institución D. Pablo Texón Castañón y D. Alberto Fernández Costales:

Pablo Texón Castañón (Felechosa, 1977) ye ún de los autores más renomaos de la lliteratura asturiana d’anguaño, ganador na pasada edición del premiu «Xuan María Acebal» del Principáu d’Asturies col poemariu Allumamientu, destaca tamién polos sos trabayos como narrador y traductor. Amás, ye lletrista de dellos grupos y cantautores asturianos. Ye llicenciáu en Filoloxía Española y Especialista en Filoloxía Asturiana y collabora davezu con esta Academia como profesor de la Universidá Asturiana de Branu (UABRA).

Alberto Fernández Costales (Xixón, 1978) ye Doctor en Filoloxía Inglesa y profesor del Área de Didáutica de la Llingua y la Lliteratura dientro del Departamentu de Ciencies de la Educación de la Universidá d’Uviéu y coordinador del Programa de Doctoráu n’Educación y Psicoloxía. Como espertu en Sociollingüística participó en dellos volúmenes con artículos al rodiu del asturianu. Collabora cola Academia de la Llingua no que cinca a la calidá y el siguimientu de los artículos espublizaos en Lletres Asturianes y dirixó dixebraos cursos na Universidá Asturiana de Branu (UABRA).

Esta Xunta Estraordinaria de l’Academia de la Llingua Asturiana finará col discursu institucional del Presidente, D. Xosé Antón González Riaño nel que, acordies cola actualidá socio- política estatal y asturiana, va facese una reflexón fonda sobre’l futuru de la llingua asturiana y sobre’l papel social qu’ha xugar l’Academia de magar esti momentu.

El Día de les Lletres Asturianes faise en collaboración col Conceyu d’Uviéu al traviés de la so Fundación Municipal de Cultura, institución cola que se co-edita la revista Lliteratura, qu’inxertará, nesti nuevu númberu, una esbilla del panorama teatral n’Asturies.

Tamién te podria gustar