L’Academia califica de “mui grave” la valoración del inglés nes prebes pa la TV

27 xunetu 23:18 2005 Imprimir

L’Academia de la Llingua acusa al gobiernu del Principáu de nun tener “la mínima intención de respetar la llingua” tres la publicación nel BOPA d’ayeri miércoles 27 y güei xueves 28 de la convocatoria pa les prebes de selección de personal destinaes al Ente Públicu de Comunicación. Nelles la conocencia del asturianu refúgase énte la obligatoriedá de dominar llingües como l’inglés o el francés.

Pa l’Academia la falta de consideranza dala al idioma asturianu nes prebes de selección de los futuros redactores y técnicos d’antena y conteníos de la Radio Televisión Autonómica “ye mui grave” y considera que “mientres desapaez l’asturianu s’imponga una prueba obligatoria y eliminatoria n’inglés o francés que, evidentemente, nun son llingües oficiales d’Asturies”. La institución llingüística entiende que “el calter eliminatoriu d’esta prueba, ye una señal evidente de que los sos dirixentes prefieren periodistes que residan nel estranxeru y dominen eses llingües que profesionales venceyaos a Asturies, a la so cultura y a la so llingua”.

El comunicáu ye bien duru cola manera na que se ta entamando a poner en marcha l’Ente de Comunicación y manifiesta que “el camín escoyíu pa la futura radiotelevisión asturiana lleva asina a construir un mediu de comunicación que podía mesmamente emitir en cualquier sitiu del mundu que nun fuera Asturies, marxinando de los sos conteníos y de les sos formes d’espresión a la cultura asturiana y dexando de llau a los escelentes profesionales que dende hai años trabayen por Asturies y pola so cultura”. L’Academia remembra que “nenguna radiotelevisión autonómica llevó a cabu una seleición de personal que refugare tanto la cultura propia y en toes elles hai un respetu pola llingua que dende la direición d’esta radiotelevisión que se diz asturiana nin se tien nin se quier tener”. Pa la másima institución llingüística d’Asturies esta decisión “torga dafechu’l desarrollu d’una industria audiovisual asturiana, basada na realidá llingüística y cultural d’Asturies”.

Nel comunicáu fechu públicu l’Academia responsabiliza al Gobiernu del Principáu de la situación y afirma que “toles sos declaraciones en favor de “potenciar” l’asturianu o “normalizar” el so usu nun son más que pallabres vacíes”. Poro la institución píde-y al executivu que preside Vicente Álvarez Areces que reconsidere “esti grave determín que va a la escontra del sentíu común y, tamién, a la escontra del espíritu y la lletra del Estatutu d’Autonomía y de la Constitución española, que favoreció’l respetu por toles llingües, pero que n’Asturies sigue siendo papel moyao no que se refier a los drechos llingüísticos de los asturianos”.

Convocatoria BOPA

  Categories:
Loading Facebook Comments ...