La Yincana Automovilística Antroxera d’Avilés algama’l domingu’l so 38ª edición

La Yincana Automovilística Antroxera d’Avilés algama’l domingu’l so 38ª edición
28 febreru 10:52 2019 Imprimir

La clásica Yincana Automovilística Antroxera va celebrase’l domingu 3 de marzu a partir de les 17 hores na Plaza Domingo Álvarez Acebal. La cita, entamada pol Conceyu d’Avilés en collaboración cola Escudería Avilesina, llega en 2019 a so trixésimu octava edición.

Van partise 2.060 euros en premios y los participantes van percorrer colos sos vehículos les cais del centru d’Avilés, en busca de 6 pruebes distintes que-yos fadrán dir sumando puntos hasta consiguir la victoria. A les 17:00 hores tendrán de tar presentes colos sos vehículos na Plaza de Domingo Álvarez Acebal, y media hora más tarde va producise el pistoletazu de salida.

Los distintos equipos participantes tienen de cuntar con un mínimu de 2 y un máximu de 4 persones. Van Tener que dir pescudando ónde s’atopen los seis pruebes de les que consta la Yincana, gracies a les pistes que-yos va dir facilitando la organización. Tantu les pruebes como’l percorríu van ser secretes hasta’l mesmu domingu.

Nun va ser obligatoriu que los vehículos tean amarutaos para tomar parte na prueba, pero sí lu será l’allugamientu de pegatinas identificativas que van ser facilitaes pola organización.

Los premios van ser otorgaos en dos categoríes.

Per un sitiu, la Clasificación Xeneral, na qu’en cada prueba del percorríu va otorgase distinta puntuación a los participantes dependiendo de la so maña nes mesmes. El ganador va ser el que mayor puntuación llogre, y en casu d’empate, va escoyese’l que menor tiempu invirtiera. Van concedese premios a los seis vehículos meyor clasificaos, con cantidaes que van dende los 120 hasta los 550 euros. Amás, van apurrise trofeos a los trés primeros clasificaos.

Per otru llau, para optar a la Clasificación para los Vehículos Meyor Amarutaos, va ser necesariu que’l vehículu tea siquier nun 90% de la so superficie amarutáu. Va Ser imprescindible que siquier trés vehículos participen nesta categoría, en casu contrariu va quedar erma. va valorase’l conxuntu del disfraz del vehículu y de los sos ocupantes.

Nesti casu, los premios van ser de 300 euros y un troféu para’l primera clasificáu, y de 150 euros para’l segundu clasificáu. Nos vehículos con dellos inscritos, va partise los premios de forma prorrateada, tantu’l correspondiente a la Clasificación Xeneral como’l Vehículu Meyor Amarutáu.

La Yincana cuenta con un tiempu máximu de desenvolvimientu de 2 hores. Si devasar esi tiempu, el control va quedar zarráu y quien nun apurrieren les sos pruebes, van quedar escluyíos.

  Categories: