La XVI Seronda n’Avilés estrena allugamientu na plaza Hermanos Orbón

La XVI Seronda n’Avilés estrena allugamientu na plaza Hermanos Orbón
19 ochobre 09:04 2018 Imprimir

El vienres 26 y el sábadu 27 d’ochobre tol día la XVI Seronda n’Avilés estrena allugamientu na plaza Hermanos Orbón. Nesta nueva edición dase tovía más puxu a les actividaes empobinaes a neños y neñes en “La Reciella na Seronda”, con talleres creativos, xuegos populares y animación a cargu d’Olga Cuervu y David Varela.

La seronda xunta dalgunos de los pegoyos tradicionales n’aldega asturiana. Tiempu de dir a la gueta, guardar mazana y maíz, facer sidra… Avilés mueve’l maxín, naguando y puxando pola conocencia de les costumes vieyes, calteniendo vivu’l guo raigañu pente toles xeneraciones. Asina, tolos años, y yá van 16 ediciones, festéxase la Seronda n’Avilés. Esti añu estrénase’l sitiu onde va tar, na plaza Hermano Orbón, o como se conoz tradicionalmente, la plaza Les Aceñes, nos díes 26 (vienres) y 27 (sábadu) d’ochobre, tol día. La música sedrá protagonista con sesión vermú’l vienres, baille y danza tradicional, y l’actuación de bandes de gaites y grupos folk. Na plaza tamién vanse poner puestos con productos ecolóxicos y artesanos.

Entamada pola conceyalía de Cultura per aciu de la Fundación Municipal de Cultura y la Estaya de la Llingua, en collaboración con Xuntanza Avilés, asina como col Mercáu Ecolóxicu y Artesanu y Asociación Cultural  Piniella, esta nueva edición presentóla esta selmana Yolanda Alonso, conceyala de Cultura d’Avilés, José Federico Álvarez, José María Villaboy y Marisa Luque, presidente, tesoreru y secretaria de la Federación Xuntanza Avilés, y Montserrat Machicado, responsable de la Estaya de la Llingua d’Avilés.

Música popular, animación, chigre, productos de seronda (sidra, castañes, tortos…), cuentos, lleendes, sones y cantares tradicionales, amuesa de bailles, gaites, pandereteros, folk asturianu, contumes (amagostar castañes, facer sidra…), mercáu ecolóxicu y artesanu y comida popular (pote de berces y arroz con lleche)…Too marcao con un tastu bien asturianu. El xaréu va sentise  per tola Plaza, con espacios distintos nos que se van desendolcar les propuestes preparaes pa pasalo mui bien.

El vienres pela mañana va dedicase a lo trabayao coles escueles d’Avilés. Güei a última hora de la tarde fállase’l premiu del Concursu de Cartelos de Seronda, con un xuráu que preside’l pintor Favila, y l’alumnáu de la escuela ganadora sedrá l’invitáu pa participar na Seronda’l vienres 26 pulga mañana.

El programa infantil inclúi talleres creativos, como “Fia la to chapa”, “Pinta y diseña la to obra”, “Recicla cola seronda” y “Crea la to mascota”; tamién xuegos populares, como la xaronca, cuerda, carrera de panoyes o piesca de la botella; van vivir una esfoyaza y recibir castañes y sidra del duernu. Amás, l’actriz Olga Cuervu y el músicu David Varela van encargara de l’animación, dende les 11 hores.

La música va tener munchu protagonismu, y yá entama’l vienres na sesión vermú a sentise cola banda “Los Gascones”, a les 13 hores, que van repitir el sábadu a la mesma hora. El folk, la gaita, el baille y la danza tradicional tarán siempres presentes. La nueche del vienres sedrá del baille, cola “Nueche en Danza”, dende les 22:30 hores, y la del sábadu, a la música, con “A mover la patuca”, dende les 22 hores, coles actuaciones de Serendén y el Koku la mazana.

Na plaza habrá puestos del Mercáu Ecolóxicu y Artesanu, con xente artesanu trabayando en vivu. Y nun va faltar el sábadu la Xinta popular. A un preciu de 5 euros va poder esfrutara de pote de berces y arroz con lleche, dende les 14.30 hores. Otra novedá, ye que’l sábadu pulga tarde hai teatru costumista asturianu, en “¡A escena!”, cola actuación del Grupu Garrapiellu, de Piarnu, a les 18:30 hores. Van representar la obra “La criada de tayuela”.

La inauguración oficial de la Seronda sedrá’l vienres a les 19:30 hores, cola actuación de la banda de gaites El Trasno, de Coaña.

Más información

  Categories: