Portada Conceyos La Xunta Xeneral torga la demanda de los conceyos a favor de la música en vivu

La Xunta Xeneral torga la demanda de los conceyos a favor de la música en vivu

by redacción asturnews
Músicos tocando en Ca Beleño

La Xunta Xeneral, no que delles organizaciones calificaren güei de “rumbu d’incongruencia”, torgaba la demanda de los conceyos a favor de la música en vivu gracies al votu negativu de PP, PSOE, Foro y Ciudadanos.

Los mesmos partíos que sofitaron en Xixón y dellos otros conceyos la propuesta pa encamentar al Principáu a dexar les actuaciones en directu votaben esti día en contra nel Parlamentu a la iniciativa de Podemos Asturies que recueye esta reivindicación compartida por numberosos conceyos d’Asturies. Y güei mesmo, dende Xixón Sí Puede (XsP) víase con perplexidá la votación que se rexistró na Xunta Xeneral en relación a una propuesta de Podemos Asturies pa dexar la música en vivu en locales d’hostelería. La iniciativa namái recibió’l sofitu de Podemos Asturies ya Izquierda Xunida, ente que’l restu, PSOE, PP, Foru y Ciudadanos, votaron en contra.

Nun comunicáu asoleyáu esti llunes de tarde, XSP quería dexar afitao que nun yera a entender “por qué estos grupos políticos caltienen nos conceyos una posición y nel Principáu la contraria”. Dicíalo Orlando Fernández Casanueva, conceyala de XsP, qu’amosaba’l casu de Xixón, onde nel Plenu de xunu XsP ya IX llevaron xuna proposición pa encamentar al Principáu a un cambéu del catálogu d’espectáculos públicos pa dexar la música en directu nos locales d’hostelería, a la que tolos grupos, cola esceición del PSOE que s’abstuvo, votaron a favor.

“Esa mesma iniciativa lleva dos selmanes dempués a la Xunta Xeneral y los partíos qu’equí voten a favor, ellí voten en contra. Esto fai que los conceyos volvamos tar bloquiaos, a pesar de qu’Uviéu, Avilés, Xixón, Siero y Corvera yá aprobaron proposiciones asemeyaes. Hai xuna voz mayoritaria nos conceyos pa dexar la música en vivu que se bloquia nel Parlamentu asturianu”, denunciaba Fernández Casanueva.

Nel casu de Xixón, el conceyal de XsP plantega tantu a l’alcaldesa de Xixón, Carmen Moriyón, y la diputada de Foru Asturies, Maria del Carmen Fernández, cómo ye posible que’l mesmu grupu políticu vote de manera distinta en dos instancies distintes. La diputada de Foru “acusó” a Podemos Asturies de querer imponer el modelu cultural de Somos Uviéu y punxo como exemplu la situación en Xixón: “Hai que recorda-y a esta diputada qu’en Xixón el consensu esiste y que Foro vota a favor de la música en directu nos locales d’hostelería. El problema ye que los y les diputaes nun saben lo que ta asocediendo nos conceyos y ven pantasmes onde nun los hai”, señala Fernández Casanueva.

Asina, nestes propuestes lo único que se pide ye modificar el catálogu d’espectáculos públicos pa que nos locales d’hostelería tamién puea haber música en directu. “Poques proposiciones llegaron a la Xunta Xeneral con tal grau de consensu, col sofitu de los colectivos musicales, hosteleros, del mundu académicu, y sofitáu por un clamar ciudadanu que paez nun ser capaz les puertes del Principáu de Asturies”, indica’l conceyal de XsP.
Esta situación asemese abondo a la vivida cuando se presentó la conocida como “Llei Sinde” sobro derechos d’autor: “Les y los representantes políticos nun entendieron nos parlamentos lo que taba pasando, mientres na cai había un clamor pa derogar aquella norma qu’atentaba contra’l derechu a la cultura y la distribución de la conocencia. Y lo que vieno dempués yá lo sabemos: la campaña Nun los Votes y el @15M”, rellata Fernández Casanueva. Pela so parte, XsP va siguir sofitando toles iniciatives ciudadanes na cai y nes instituciones por que los y les diputaes que votaron en contra d’esta iniciativa, rectifiquen.

Tamién te podria gustar