Portada Educación La Xunta Xeneral esixe’l caltenimientu de les plantiyes y nun amortizar places por xubilación nos centros educativos

La Xunta Xeneral esixe’l caltenimientu de les plantiyes y nun amortizar places por xubilación nos centros educativos

by asturnet

El Plenu de la Xunta Xeneral aprobó esta mañana la moción d’IX na que demanda al Gobiernu’l cumplimientu estrictu y na so totalidá de los alcuerdos sobre les plantiyes educatives suscritos nel so día coles organizaciones sindicales de la enseñanza, nun amortizar nos próximos cursos nenguna plaza vacante por xubilación sacantes qu’alleguen circunstancies escepcionales qu’asina lo aconseyen, al mesmu tiempu que s’aputaba n’esixir l’apertura d’un procesu de negociación coles organizaciones sindicales de la enseñanza y los centros educativos tendente a establecer una plantiya propia pa cada centru, qu’evite no posible itinerancies y puestos compartíos y, a lo último, nun suprimir unidaes en nengún nivel educativu hasta tantu nun se concluyera’l procesu de matriculación.

Esta iniciativa foi aprobada por unanimidá en dos de los sos puntos, el primeru y el terceru, pero’l Partíu Socialista amosose en contra del puntu segundu y el cuartu, los que se referíen a non amortizar nos próximos cursos nenguna plaza vacante por xubilación (sacantes qu’alleguen circunstancies escepcionales qu’asina lo aconseyen) y nun suprimir unidaes en nengún nivel educativu hasta tantu nun se concluyera’l procesu de matriculación. A lo postrero, el conxuntu foi aprobáu col sofitu d’UPYD, PP y FORU.

Sigún informa IX na so web, Emilia Vázquez, diputada d’IX responsable de los asuntos d’Educación, argumentó “la necesidá del cumplimientos d’estos puntos sobre la base de qu’Asturies siga calteniendo una educación calidable -como demuestren distintes comparancies publicaes- y pa ello, dixo, ye necesariu emprestar atención a la diversidá y establecer midíes pa evitar les desigualdaes o defender l’autonomía de los centros, según les plantiyes de los centros sían estables pa poder siguir coles evaluaciones y proyectos, ente otres cuestiones”. Emilia Vázquez alvirtió tamién de que “na enseñanza asturiana perdiéronse places de profesores: nel cálculu más conservador 345 places en primaria y secundaria nos últimos trés cursos, frente a 1.319 xubilaciones lo que significa que siquier un 26% d’eses places estables quedaron desaniciaes”.

Vázquez contraargumentó que ye verdá que les necesidaes tán cubiertes al entamu del curso pero “falamos d’emplegu estable y calidable, de que nun se vaigan sustituyendo pasu ente pasu una plantiya de funcionarios estables por una plantiya d’interinos provisionales, que ye lo que ta empezando a asoceder y puede afondase de siguir nesta dinámica”.

N’avientu había, según los datos de la diputada, en Primaria 1.316 interinos y en Secundaria 1004, anque yá son más. “Esos profesores que de xuru faen el so tra baxu perbién, poniendo tol so enfotu, son profesores que tán unos meses nun centru y otros n’otru colexu o al añu siguiente van al paru” y eso va en contra de la calidá educativa, de los proyectos educativos de los centros y del sofitu a los alumnos, esplicó Vázquez.

Tamién te podria gustar