La Xunta pola lleva la oficialidá a les redes pol confinamientu

La Xunta pola lleva la oficialidá a les redes pol confinamientu
04 mayu 19:24 2020 Imprimir

La Xunta pola Defensa de la Llingua Asturiana (XDLA) vieno acabante plantegar la reivindicación de la oficialidá nel contestu del Día de les Lletres Asturianes, qu’esti añu nun va ser a desenvolvese pol confinamientu, llevando esa reivindicaciones a les redes sociales.

La Xunta pola tien la concencia de que la llingua asturiana tien que formar parte del procesu de reconstrucción social y económicu que se ponga en marcha desque acabe la crisis sanitaria y l’estáu d’alarma. Y por mor d’ello, a pesar de que’l Día de les Lletres Asturianes que se celebra tolos años el vienres de la primer selmana de mayu quedó aplazáu hasta la seronda pola crisis sanitaria xenerada pol Covid-19, la Xunta pola Defensa de la Llingua Asturiana (XDLA) va siguir cola reivindicación llingüística. La organización cívica va llevar la reclamación de la oficialidá de la cai a les redes sociales con delles iniciatives pa que la xente d’Asturies dexe claru’l compromisu col futuru de la llingua asturiana.

La primer iniciativa va llevase alantre a lo llargo de tola selmana y consiste en que les persones usuaries de les redes sociales xuban semeyes onde se pueda ver la so participación en dalguna manifestación del Día de les Lletres d’años anteriores. Van tener que facelo colos hashtags #YoTuvi #SemeyaMani. L’asociación quier asina que la xente muestre’l so apoyu a lo llargo de décades a estes convocatories que siempre enllenaron la cai Uria.

Otra manera, el vienres 8 de mayu, fecha na que se diba celebrar la manifestación pola oficialidá, la XDLA va entamar una campaña en Twitter pa que tolos asturianos tuitien frases sobre la oficialidá, la llingua asturiana o la falta d’un marcu llegal afayadizu pal nuestru idioma. Too eso va facese a partir de les 19.00 hores -hora de la manifestación- col hashtag #Oficialidá. Pa esi momentu tamién ta preparando dalguna sorpresa más.

L’asociación va dir a lo llargo de la selmana animando la convocatoria con otres iniciatives p’acompañar y afalar la reivindicación que dende hai décades ta presente na cai y qu’agora, desque acabe la crisis sanitaria y l’estáu d’alarma, garra más fuercia que nunca: la llingua asturiana tien que formar parte del procesu de reconstrucción social y económicu que se ponga en marcha.

La Xunta pola Defensa de la Llingua Asturiana llama a partíos políticos, sindicatos y asociaciones culturales y deportives, amás d’a la ciudadanía en xeneral, pa qu’apoyen estes campañes al traviés de les sos redes y que la primer selmana de mayu, vinculada dende hai décades a la esixencia d’un futuru pal nuestru patrimoniu llingüísticu, nun quede falta d’esti conteníu.

Loading Facebook Comments ...