Portada Comunicación La Xunta Pola llama a una movilización masiva pola oficialidá

La Xunta Pola llama a una movilización masiva pola oficialidá

by redacción asturnews

La Xunta pola Defensa de la Llingua Asturiana vieno acabante, tres de conocese’l discursu institucional del Día d’Asturies, de llamar a una movilización masiva pola oficialidá que tendría llugar esti próximu 16 d’ochobre.

Ente l’anunciu fechu esta mañana pol presidente Adrián Barbón sobre l’apertura de la reforma del Estatutu d’Autonomía, que necesariamente va incluyír la oficialidá de la llingua asturiana y del gallego-asturianu pala Xunta pola Defensa de la Llingua Asturiana, l’asociación de defensa del idioma llamaba “a tola sociedá d’Asturies a participar el sábadu 16 d’ochobre a les 12:00 hores, dende la estación del Norte d’Uviéu, nuna manifestación que pue ser histórica”.

Sigún la Xunta Pola “ye la primer vez que vamos salir a la cai a animar una iniciativa del Gobiernu asturianu que va cuntar cola gran mayoría de diputaos y diputaes de la Xunta Xeneral y que va poner puntu final a la marxinación de los derechos llingüísticos n’Asturies”.

L’Asociación diz que tamién pide a la ciudadanía salir a la cai “pa llamar a la reflexón a la minoría parllamentaria qu’entá s’opón al reconocimientu de la oficialidá. Nun se sostién más tiempu que n’Asturies se siga refugando lo que respalden nos demás territorios del Estáu con otra llingua propia. Llegó’l momentu nel que van tener que decidir si quieren sumase a la protección del patrimoniu llingüísticu d’Asturies o si quieren quedar retrataos na historia como los últimos reaccionarios qu’intentaron desanicialu.

La reforma del Estatutu entama agora y tien qu’acabar llueu: “Esti procesu nun pue siguir allargándose más tiempu. Por eso, facemos un llamáu a tola sociedá civil d’Asturies, a toles organizaciones sociales, culturales, sindicales, polítiques y de cualquier clas, a tolos asturianos y asturianes, a sumase a esta convocatoria qu’entamamos col enfotu de que seya la última manifestación pola oficialidá”.

Tamién te podria gustar