Portada Sociedá La Xunta pola llama a manifestase esti sábadu pola Oficialidá

La Xunta pola llama a manifestase esti sábadu pola Oficialidá

by redacción asturnews

La Xunta pola Defensa de la Llingua Asturiana (XDLA) fai un llamáu a tolos asturianos y asturianes pa que, como vienen faciendo dende hai 40 años, amuesen esti sábadu a les doce na Estación del Norte d’Uviéu  l’apoyu a la igualdá de derechos llingüísticos ente tola ciudadanía y a un futuru dignu pal nuestru patrimoniu llingüísticu.

Esti sábadu 7 de mayu a les 12 hores, va salir de la Estación del Norte d’Uviéu una manifestación pola oficialidá que va acabar na Plaza de la Escandalera. Ellí, la cantante Alicia Villanueva, l’escritor y músicu Xaime Martínez, la filóloga María Abril y el traductor Miguel Sánchez van encargase de lleer el manifiestu final, mentes que’l grupu Algaire va encargase de poner el ramu a la xornada reivindicativa con un miniconciertu.

La XDLA punxo en marcha la campaña en redes #ElVasuDeLaOficialidá, pa que la xente ayude a promocionar la convocatoria sacando una semeya con un vasu, en referencia al cartel de la manifestación y la metáfora “d’enllenar el vasu de la oficialidá ente toos”.

La XDLA quier recordar que la oficialidá namás ye’l reconocimientu llegal del derechu que tien cualquier persona a usar llibremente la llingua propia d’un territoriu. La oficialidá ye un avance democráticu porque amplía derechos y llibertaes ciudadanes. N’Asturies tenemos dos llingües propies, l’asturianu y el gallego-asturianu, y los sos falantes nun tienen reconocíu llegalmente esi derechu.

Nel comunicáu de la convocatoria asoleyáu esta selmana, la Xunta pola quier dexar bien a les clares que “si les nuestres llingües son como les demás llingües del Estáu, ¿por qué los sos falantes tienen menos derechos que los falantes d’otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu. Nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l’Estatutu d’Autonomía p’aprobar la oficialidá y depués, con una Llei de Normalización, siguir un procesu adaptáu a la situación asturiana”.

Tamién te podria gustar