Portada Comunicación La Xunta Pola fai un llamamientu a la responsabilidá al Gobiernu y al PSOE

La Xunta Pola fai un llamamientu a la responsabilidá al Gobiernu y al PSOE

by redacción asturnews

La Xunta pola Defensa de la Llingua (XDL) fai un llamamientu a la responsabilidá al Gobiernu asturianu y al PSOE, y tamién a los demás grupos parllamentarios pa que nun pierdan de vista que lo importante ye la declaración d’oficialidá.

Dende qu’empezó esta llexislatura, en mayu del 2019, pidimos a tolos grupos parllamentarios qu’entainaren yá ensin más demoranza coles negociaciones pa la reforma del Estatutu. Nin un día más con un derechu menos, llevamos diciendo dende entós.

Na opinión de la XUnta pola ye bien evidente que “nesta llexislatura l’únicu partíu con capacidá pa entamar esi procesu ye’l PSOE, bien a propuesta del Gobiernu, bien a propuesta d’un númberu superior a 11 representantes na Xunta Xeneral. Namás el PSOE cumple cualquiera d’eses condiciones. Correspuende polo tanto al PSOE la responsabilidá d’entamar la reforma. Quier dicise, la responsabilidá de poner enriba la mesa una propuesta de redacción del artículu 4 y d’entamar la negociación sobre esa propuesta colos demás grupos parllamentarios”.

Güei, a 12 de payares del 2021, cuando empiecen a acurtiase los plazos d’esta llexislatura, “tovía nun se conoz propuesta nenguna. Namás conocemos condiciones. Pero condiciones ¿pa qué? Primero de falar de condiciones tan negatives como la d’imponer una mayoría reforzada de 3/5 pa la futura Llei de Normalización (que daría capacidá de vetu pa cualquier política llingüística a una minoría de 19 diputaos contra una mayoría de 26 y quitaría a cualquier futuru gobiernu la capacidá y la responsabilidá de proponer meyores y adaptaciones a la llei), ye necesario saber qué ye lo que se propón modificar, qué propuesta de redacción presenta’l PSOE pal artículu 4. Fuera d’eso namás hai fumu”.

Na nota de prensa asoleyada esta fin de selmana, la XDL dexa bien a les clares que “hasta qu’esa propuesta nun tea enriba la mesa, la discusión sobre si hai o nun hai 27 diputaos p’apoyala ye namás una distracción. 27 diputaos p’apoyar ¿qué concretamente? El Día de les Lletres Asturianes del añu 2019, diximos qu’hasta que nun s’entame’l procesu de reforma del estatutu nun podemos saber si hai los 27 votos necesarios, si sobren, si falta un diputáu, si falten 21, o si falten toos”.

El 16 d’ochobre pasáu munchos miles d’asturianos y asturianes, como fai alcordanza la XDL “salimos a la cai a esixir que se reconozan oficialmente l’asturianu y el gallego-asturianu. Diximos qu’esperábemos que fuera la última movilización pola oficialidá. Güei queremos treslladar a la sociedá asturiana, a toles organizaciones polítiques, sindicales y sociales, que llamentablemente pue que tengamos que siguir movilizándonos pa llograr los nuestros derechos”.

Mentanto, dende la Xunta Pola dicen querer facer “un llamamientu a la responsabilidá al Gobiernu asturianu y al PSOE, y tamién a los demás grupos parllamentarios. Nun ye’l momentu de dar protagonismu a disputes menores. Ye’l momentu d’exercer l’altor de mires y la responsabilidá que nun se tuvieron nestos 40 años”.

Tamién te podria gustar