La Xunta Pola diz que “agora va vese si hai voluntá de facer política llingüística o política de distracción”

28 xunetu 15:40 2015 Imprimir

Recibe con optimismu pero sentíu críticu’l nomamiemntu de Genaro Alonso como Conseyeru

“El nomamientu d’un conseyeru d’Educación y Cultura sensible al asturianu nun pue ser namás un xestu y ha venir acompañáu por un Gobiernu enteru qu’asuma la visibilización y tresversalidá de la normalización, por equipos de trabayu de valir y capacidá, y pol control de contino de los grupos parllamentarios comprometíos cola oficialidá y la defensa de los derechos llingüísticos”. Con estes pallabres y l’alvertencia de que “agora va vese si hai voluntá de facer política llingüística o política de distracción”, recibía la Xunta pola Defensa de la Llingua’l nomamientu de Genaro Alonso como Conseyeru d’Educación y Cultura.

Díes atrás conociéronse noticies relatives a la manera de dar cumplimientu al pactu d’investidura en materia llingüística y falóse de “reforzar el nivel institucional de la Política Llingüística” nel organigrama del Gobiernu nuevu que se ta configurando. Y esto, quier recordar la XDLA, “materializóse de mano al poner al frente de la Conseyería d’Educación y Cultura a una persona como Genaro Alonso Megido, con una trayectoria comprometida col asturianu. Anque l’aumentu de nivel institucional y xerárquicu de la Política Llingüística (dende va años encuadrada nuna dirección xeneral) ye necesariu y supón, de mano, más autonomía y capacidá de decisión, la realidá d’estes últimes llexislatures demostró que nun valió pa impulsar un planeamientu efectivu de normalización llingüística”.

Según despliquen de la XDLA “la dirección xeneral de Política Llingüística tuvo baxo’l control de la conseyera Ana Rodríguez y del viceconseyeru Alejandro Calvo, dos persones a les que nun-yos da más l’asturianu, como se demostró na presencia escasísima d’ellos nos actos de la Selmana de les Lletres y, nel casu de la conseyera, na so negativa a usar l’asturianu oralmente neses actividaes tan simbóliques. Como se demuestra, por supuestu, na paralización y los retrasos nestos años de les poques actividaes que llevaba alantre la dirección xeneral (subvenciones, premios lliterarios, Premiu al Meyor Cantar, Axenda Didáctica, Xunta de Toponimia, etc.). Y como se demuestra na ausencia d’iniciatives normalizadores, nel abandonu de la Rede de Normalización Llingüística nos Conceyos, nel usu nulu de la toponimia yá oficial pola Conseyería d’Educación, Cultura y Deporte, nel recorte progresivu d’ayudes, etc”.

Esti análisis tan negativu de la XDLA, “tovía sería peor si’l puntu de vista fora más global y abarcara tol Gobiernu asturianu, porque hai que recordar que l’usu del asturianu o de la toponimia oficial ye nulu fuera de la Conseyería de Cultura. Pa bien ser, la política llingüística nun tenía que depender namás de Cultura sinón ser tresversal a tol organigrama de Gobiernu dependiendo de Presidencia. Pero, insistimos, el primer problema ye si nun hai una voluntá de facer política llingüística sinón de facer política de distracción. Porque, si ye asina, da igual en qué nivel xerárquicu se ponga la política llingüística nin qué persona tea al frente. Será un home o una muyer de paya, un parapetu, que ta ellí p’adornar, pa facer que fai o pa facer lo que-y dexen namás, como hasta agora. Esperamos que Genaro Alonso lleve alantre’l so mandatu y pueda ser consecuente nel so llabor cola sensibilidá que tien hacia l’asturianu”.

La Xunta nun quier dexar de facer alcordanza que “el PSOE tien demostrao de sobra nestos años la so capacidá pa engañar a los sos socios de Gobiernu en materia llingüística. Saludamos la existencia d’una conseyería, una viceconseyería, una dirección xeneral y un serviciu que puedan llevar alantre la política llingüística”.

Na nota de prensa asoleyada esta mañana, la organización de defensa de la llingua asturian quier dexar afitao que “fai falta poner al frente a persones de valía y prestixu reconocíu, pero al empar tamién va facer falta un control de contino al Gobiernu por parte de los grupos realmente comprometíos cola oficialidá y los derechos fundamentales de la cuidadanía asturiana. Y esto tien que facese basándose nun plan de midíes normalizadores clares, con oxetivos, presupuestos y feches pa poder contrastales, non en promeses vagues que queden en nada”.

  Categories:
Loading Facebook Comments ...