Portada Documentu La Xunta pola Defensa de la Llingua pronunciase sobre l’enseñu del asturianu

La Xunta pola Defensa de la Llingua pronunciase sobre l’enseñu del asturianu

by asturnet

MANIFESTACIÓN. En Maxisteriu y nel Sistema Educativu La Llingua Asturiana ¡Como les Demás!

La Xunta pola Defensa de la Llingua Asturiana convoca una movilización p’aparar los intentos d’eliminación de la llingua asturiana nel sistema educativu.
Tenemos que volver movilizanos pa desixir al gobiernu asturianu que cumpla la llexislación vixente que regula la presencia del idioma nel sistema educativu, una llexislación que yá de mano ye curtia y probe pero qu’amás tán enfotaos n’achaplar.
Hai actualmente dos problemátiques concretes qu’amenazen seriamente’l derechu al estudiu de la llingua asturiana:

1.

La propuesta de la dirección de la Escuela de Maxisteriu d’escluir a la llingua asturiana de los nuevos planes d’estudiu qu’han aprobase nel procesu d’adaptación al nuevu marcu europeu de Bolonia.
Una de les consecuencies de l’adaptación al marcu europeu ye la desapaición de los títulos propios de la Universidá d’Uvieu, ente ellos el cursu de postgráu d’Espertu en Llingua Asturiana que yera’l qu’hasta agora capacitaba a los mayestros y mayestres de llingua asturiana.
Polo tanto, estos estudios tendrán agora que tar necesariamente dientro de les enseñances reglaes impartíes por esta escuela.
Nos nuevos planes d’estudiu va haber solo dos especialidaes: Educación Infantil y Educación Primaria, que van ser acompañaes de Menciones sobre materies como l’Ingles o la Educación Física.
Por too ello, la formación de los futuros profesionales de la enseñanza esixe:
- La creación d’una Mención de Llingua Asturiana. Que permita la formación de los futuros mayestros y mayestres de Llingua Asturiana.
- La presencia d’asignatures de Llingua Asturiana nos estudios comunes d’Educación Infantil y Primaria. Que permita la formación mínima necesaria pa que cuanquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu.
La dirección de la Escuela de Maxisteriu yá fizo’l primer intentu d’eliminación del asturianu na primer propuesta de planes d’estudiu que llevó a votación el pasáu 29 de febreru y que foi refugada por una mayoría de 48 contra 23.
Esa propuesta escluía cualquier posibilidá de formación pa los docentes d’asturianu, lo que supón un desacatu a lo contenío na llei 1/98 d’Usu y Promoción de la Llingua Asturiana: “la Universidá d’Uvieu tien de garantizar la capacitación del profesoráu pal enseñu del asturianu y el gallego-asturianu na enseñanza reglada.”.
Hasta’l momentu nun hai nenguna otra propuesta alternativa y nun tenemos nengún datu que nos faga sospechar que la dirección va modificar el so plantegamientu inicial d’esclusión. Por ello, pidimos nuevamente la dimisión inmediata de la directora Gloria Tellez.

2. La situación irregular y illegal, según sentencia del Tribunal Supremu, na que s’encuentren les plantíes de docentes d’asturianu na educación primaria, secundaria y bachilleratu.
La Llei 1/98 d’Usu y Promoción del Asturianu afita Artículu 10. “Nel exerciciu de les sos competencies, el Principáu d’Asturies va garantizar la enseñanza del asturianu en tolos niveles y graos, respetando non obstante, la voluntariedá del so deprendizaxe. En tou casu, el bable/asturiano va tener que ser impartío dientro del horario escolar y va ser consideráo como materia integrante del currículu.”
Por ello, el Currículum pa la Educación Primaria n’Asturies recueye la presencia y conteníos de l’asignatura de Llingua Asturiana. Anguañu, alredor de 20.000 escolinos y escolines piden y se matriculen voluntariamente de l’asignatura.
Agora, esta sentencia del Tribunal Supremu que califica d’illegales a les plantiyes funcionales de docentes, dexa nel limbu llegal a los mayestros y mayestres de llingua asturiana qu’hasta agora exercíen dientro d’esi formatu.
Ye necesario que se dignifique y normalice la situación llaboral irregular de los mayestros d’asturianu y que se-yos reconozan los mesmos derechos y deberes qu’al restu docentes.
L’asignatura de llingua asturiana forma parte del currículo y polo tanto debe tener la so propia especialidá, igual que’l restu materies que s’imparten n’escueles y institutos. Agora que resclampló la situación d’illegalidá y marxinalidá na que s’obligaba a exercer a los docentes d’asturianu nun caben más escuses nin dilaciones.
La non creación d’esta especialidá solo podría significar una cosa, la intención de les alministraciones de mantener a l’asignatura nuna posición marxinal y inestable que permita la so eliminación nun futuru prósimu.
Por too ello, ente la gravedá d’esta situación y la posibilidá real d’eliminación de la llingua asturiana del sistema educativu, la Xunta pola Defensa de la Llingua Asturiana llama a tola sociedá asturiana a la movilización este sábadu 7 de marzu a les 17:00 na Estación del Norte d’Uvieu. Pola defensa d’unes conquistes que nun pueden tener marcha atrás. Estudiar asturianu ye un derechu al que nun podemos denunciar.

Tamién te podria gustar