La Xunta pola Defensa de la Llingua Asturiana llamenta les declaraciones de Consuelo Vega sobre la oficialidá

La XPDLLA ta acabante d’emitir un comunicáu nel que “llamenta” les declaraciones feches al respective de la oficialidá pola Directora Xeneral Promoción Cultural y Política Llingüística, Consuelo Vega, nes que la responsable dixo “nun ver consensu abondo pa la oficialidá”. Pa la XPDLLA estes declaraciones “suponen la confirmación del pocu conteníu que va tener esi cargu en manes de daquién que sigue de pe a pa les consignes más conocíes del nucleu duru de la Federación Socialista Asturiana”.

Con estes declaraciones, sigue’l comunicáu “Consuelo Vega vuelve a centrar el debate de la oficialidá non nuna cuestión de derechos ciudadanos sinón na pura y simple aritmética parllamentaria”. Dende la XPDLLA “cuando la FSA se niega sistemáticamente a dialogar o a buscar consensos sobre la oficialidá cola sida de qu’eso nun ta nel so programa electoral, o cuando identifica los votos a Izquierda Unida colos votos de tolos favorables a la oficialidá, quier dar el mensaxe falaz de que los votantes del PSOE tán en contra de la oficialidá”.

Pa la Xunta pola “Vega, coles sos declaraciones, ta confundiendo les élites refractaries de dalgunos partíos colo que ye’l sentir mayoritariu de la sociedá”. Pa la Xunta pola Defensa de la Llingua Asturiana “resulta llamentable que cuasi diez años depués d’aprobase la conocida como «Llei del Bable» –que s’incumple sistemáticamente en cuantes a la enseñanza, medios de comunicación y usu institucional–, la Directora Xeneral Promoción Cultural y Política Llingüística descubra qu’hai «un campu llegal mui grande col marcu llegal qu’existe agora»”.

La XPDLLA recuerda que Vega “cuando se-y pregunta polos casos de discriminación llingüística asocedíos a funcionarios qu’usaron l’asturianu nes sos comunicaciones cola Alministración autonómica, refierse a ellos como «casos anecdóticos», nun los incluye ente los derechos reconocíos pola llei y ve difícil formar a los emplegaos públicos pa que conozan l’asturianu”. Los responsable de la XPDLLA comenten que “Si esi va ser el plantegamientu d’una persona que diz pertenecer al campu asturianista, mal pue acabar la cosa cuando a pocos meses d’asumir el cargu asume tamién –y tan rápido– la visión restrictiva de los derechos ciudadanos que fai la FSA”. Pa la organización oficialista “la realidá oxetiva ye que n’Asturies, güei, depués de venticinco años d’Estatutu d’Autonomía, sigue habiendo un movimientu ciudadanu que reclama unos derechos llingüísticos qu’una clas política intransixente y provinciana sigue ensin reconocer”.