La Xunta llama güei a facer Trending Topic la #oficialidá

by redacción asturnews | mayo 8, 2020 11:29 am

La Xunta pola Defensa de la Llingua Asturiana(XDLA)  nun quier dexar de ser fiel a la cita reivindicativa del Día de les Lletres y fai un llamamientu por qu’esti vienres 8 de mayu a les siete la tarde s’enllenen les redes sociales en xeneral y Twitter en particular col hasthtag #oficialidá faciéndolo Trending Topic.

Nuna nota de prensa qu’asoleyaba esta selamana, la Xunta dexaba bien a les clares so enfotu: “Poles circunstancies sanitares que tol mundu conoz, anguaño’l Día de les Lletres Asturianes aplazóse pa la seronda. Pero la Xunta pola Defensa de la Llingua Asturiana nun quier dexar de ser fiel a la cita reivindicativa porque nengún andanciu nin estáu d’alarma aplaza los derechos ciudadanos, así que díi apuntando la cita: vienres 8 de mayu a les siete la tarde… #oficialidá”.

La Xunta pola tien la concencia de que la llingua asturiana tien que formar parte del procesu de reconstrucción social y económicu que se ponga en marcha desque acabe la crisis sanitaria y l’estáu d’alarma. Y por mor d’ello, a pesar de que’l Día de les Lletres Asturianes que se celebra tolos años el vienres de la primer selmana de mayu quedó aplazáu hasta la seronda pola crisis sanitaria xenerada pol Covid-19, la Xunta pola Defensa de la Llingua Asturiana (XDLA) va siguir cola reivindicación llingüística. La organización cívica llevara esta selmana la reclamación de la oficialidá de la cai a les redes sociales con delles iniciatives pa que la xente d’Asturies dexe claru’l compromisu col futuru de la llingua asturiana.

La primer iniciativa llevose alantre a lo llargo de tola selmana y consistió en que les persones usuaries de les redes sociales xubieran semeyes onde se pueda ver la so participación en dalguna manifestación del Día de les Lletres d’años anteriores,  colos hashtags #YoTuvi #SemeyaMani. L’asociación quier asina que la xente muestre’l so apoyu a lo llargo de décades a estes convocatories que siempre enllenaron la cai Uria.

Otra manera, esti vienres 8 de mayu, fecha na que se diba celebrar la manifestación pola oficialidá, la XDLA entama una campaña en Twitter pa que tolos asturianos tuitien frases sobre la oficialidá, la llingua asturiana o la falta d’un marcu llegal afayadizu pal nuestru idioma. Too eso va facese a partir de les 19.00 hores -hora de la manifestación- col hashtag #Oficialidá. Pa esi momentu tamién ta preparando dalguna sorpresa más.

 

Source URL: http://asturnews.com/la-xunta-llama-guei-a-facer-trending-topic-la-oficialida/