La Xunta felicítase pola “goliada en Maxisteriu”

Col resultáu de 58 a 26 y 3 abstenciones na votación de la Xunta d’Escuela, l’asturianu entró por fin nos planes d’estudiu de la Escuela Universitaria de Maxisteriu. Ye la segunda vez que les intenciones escluyentes de la dirección del centru fueron refugaes por una mayoría clara. Precisamente, na reunión convocada a costafecha pa que se votare namás incluir o non l’idioma nun hubo intervenciones en contra de la propuesta presentada pola Comisión de Docencia. Y la Xunta pola Defensa de la Llingua Asturiana nun comunicáu que facía públicu esti miércoles “quier destacar que tol procesu lleváu alantre nesti centru universitariu ye un exemplu que ye la cuenta pa desplicar munches coses. Per un llau ye prestoso ver que’l camín faise mui abegosu pa los pocos que siguen intentando dexar al asturianu fuera de los ámbitos d’estudiu formal, escaeciendo si fai falta los mandaos llegales esistentes. Per otru, ye de valorar que’l movimientu de reivindicación llingüística ye un sistema coordináu pa facese valir cuando se ta cometiendo un claru atentáu contra los derechos llingüísticos. Hai que felicitase del trabayu fechu dende munchos puntos distintos (alumnos, profesores, sindicatos…), cola seguranza de saber qu’estos meses intensos de negociaciones, conceyos, actos reivindicativos y el bon facer de la xente que se dedicó a trabayar calladamente, asegurando esti resultáu urxente y necesariu, nun fueron de baldre. Les lleis tán pa cumpliles y acabamos de dexar claro que xuntos somos quién a impedir que se conculquen”.

A lo llargo de los últimos meses Xunta Moza foi quién a desenvolver una campaña intensiva d’información na propia Escuela, llegando a tar presente tres selmanes siguíes repartiendo fueyes esplicatives, pegando cartelos, de los que se diseñaron cinco distintos, teniendo incontables conceyos colos alumnos del centru, que participaron activamente en tol procesu, y consiguiendo, ente otres coses, más de 300 firmes a favor de la inclusión del asturianu. A too esto hai que sumar les reuniones teníes con tolos órganos de gobiernu universitarios y de l’Alministración. El pasáu día 7 de marzu la Xunta percorrió les cais d’Uviéu nuna manifestación qu’acabó delantre de la Conseyería d’Educación y que taba convocada contra la esclusión del asturianu de los planes d’estudiu.

Les movilizaciones y el trabayu pelos pasillos y despachos fueron les dos víes necesaries pa llograr que les clares intenciones de marxinación que proyectaba la dirección de la Escuela nun se materializaren.

Sicasí, “dende la Xunta nun podemos más que subrayar qu’esti pasu, anque importante, namás ye un tramu pequeñu del camín qu’entá queda por andar. L’asturianu sufre munchos impedimentos nel sistema educativu asturianu, con escolinos que nun tienen garantizaos los sos derechos, especialmente na enseñanza secundaria, y con una presencia mui probe nel tramu de los estudios universitarios. A too esto hai que sumar la situación de precariedá na que vive’l profesoráu por culpa de nun tar reconocida como especialidá l’asignatura, lo que fai que s’imparta nuna situación d’anormalidá, ensin oposiciones nin garanties de continuidá. Estes son algunes de les etapes que mos queden tovía por andar pa que’l idioma propiu d’Asturies tenga un tratamientu igualitariu nel sistema educativu y pa que seya, acordies col so calter d’ayalga cultural, una fonte de derechos que valga p’arriquecer la vida de los cuidadanos en tolos ámbitos de la sociedá.