Portada Sociedá La Xunta entrega los Premios Andrés Solar 2008 a SoftAstur y Fernando Lastra

La Xunta entrega los Premios Andrés Solar 2008 a SoftAstur y Fernando Lastra

by asturnet

La Xunta pola Defensa de la Llingua Asturiana vieno acabante facer anuncia de los gallardoniaos colos Premios Andrés Solar del añu 2008, que foron pa Softastur, “El Pegollu”, y Fernando Lastra, “El Madreñazu”.

SoftAstur ye una iniciativa de calter cívicu que traduz al asturianu programes de códigu llibre. La versión negativa de los Premios Andrés Solar, “El Madreñazu”, ye nesta ocasión pa Fernando Lastra Valdés, portavoz parllamentariu del Partíu Socialista na Xunta Xeneral, pol “papel desempeñáu a lo llargo de bien d’años cola so actitú contra tolo que suponga un avance o meyora pa la situación del asturianu, y especialmente nel últimu añu, pola so actitú contra’l reconocimientu de la llingua asturiana como llingua oficial”.

24 ediciones

Los Premios Andrés Solar algamen nesti 2008 la so XXIV edición y como nos sos ventricuatro años de vida, los premios tienen una vertiente doble: per un llau, la Xunta premia a una entidá o persona que rescamplara nel últimu añu pol so llabor en defensa de l’asturianu. Esti reconocimientu materialízase n’El Pegollu, que nesta ocasión foi pa Softastur, “una plataforma de programadores y traductores en llingua asturiana dedicada a la traducción y desarrollu de software llibre n’asturianu. Ente los proyectos de Softastur que se puen destacar tán el Sistema Operativu Ubuntu, el caltenimientu del navegador Firefox en Llingua Asturiana, y el proyectu MediaWiki. Pa la Xunta pola Defensa de la Llingua Asturiana ye mui de valorar el trabayu constante y desinteresáu de les persones que formen parte de Softastur, abriendo camín pal usu de la llingua asturiana nel ámbitu de les tecnoloxíes nueves, volviendo a amosar que l’asturianu tien y pue tar en tolos ámbitos de la vida moderna”.

Los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”, que na edición de 2008 va “pal portavoz del grupu parllamentariu de la FSA-PSOE, Fernando Lastra Valdés, pol papel desempeñáu a lo llargo de bien d’años cola so actitú contra tolo que suponga un avance o meyora pa la situación del asturianu, y especialmente nel últimu añu, pola so actitú contra’l reconocimientu de la llingua asturiana como llingua oficial d’Asturies nel testu del estatutu asturianu. Lastra recibe l’antipremiu porque, como representante de la Federación Socialista, ye ún de los ponentes que llanzó la propuesta d’artículu 4u del estatutu, que condena al asturianu a ser una llingua fuera de la categoría que nel marcu constitucional se-yos da a les llingues propies del estáu”.

L’actu d’entrega de los Premios Andrés Solar va ser el día 20 d’avientu, nel Salón d’Actos del Antiguu Institutu de Xixón. D’equí a unos díes van conocese más datos sobre l’actu, que va facer el númberu 24 na so hestoria.

Páxina web y wiki de SoftAstur

Tamién te podria gustar