La Xunta duplica esti añu’l so conciertu pola oficialidá

Un cartel colo más representativo del nuevu folk asturianu y los ritmos más actuales de la música del país ye’l ganchu col que la Xunta pola Defensa la Llingua espera que’l conciertu pola oficialidá d’esti añu repite o duplique l’esitu d’años anteriores. Dos escenarios y una gran parca van agospiar esta cita añal cola reivindicación y la folixa nel aparcaderu del Campus d’Humanidaes n’Uviéu. La Bandina, N’Arba, Felpeyu, Skontra, Skama la Rede, D’Escarpinos, K-Nalón, Xera y Dulcamara son los grupos que van tocar n’entrambos escenarios el prósimu 23 d’abril.

Xulio Casado, voceru de la Xunta, confirmó a Asturnews el remate del cartel de bandes que van actuar nel Conciertu pola Oficialidá y espresó l’enfotu de la organización por superar l’ésitu de públicu que tuvieron los conciertos de los últimos años: “paeznos que’l cartel ye lo bastante atractivu como pa qu’esti nuevu conciertu repita o supere l’acoyida de los dos últimos, que foi perbona”, afirmó Casado. Col oxetivu de favorecer l’esparcimientu y el ritmu del directu nel festival la Xunta va cuntar esti añu con dos escenarios, onde dirán alternándose les actuaciones y nel desarrollu del conciertu van ofrecese proyecciones de videos y holografíes p’ambientar con imáxenes esta folixa reivindicativa.

Nel Escenariu 1 van tocar les bandes más propiamente folkies: La Bandina, N’Arba, Skontra, Skama la Rede y Felpeyu; el segundu escenariu va recibir los ritmos diversos de les pandereteres de Dulcamara, el hip-hop de la cuenca de K-Nalón, o el son arriesgáu de Xera y D’Escarpinos. Les entraes ya tan a la venta a un preciu de dos euros enantes del conciertu y tres na entrada del aparcaderu del Campus d’Humanidaes.

El Conciertu pola Oficialidá ye una referencia nel calendariu reivindicativu del movimientu pola defensa de la llingua asturiana y fai de banderín d’enganche pa la manifestación pola reconocencia oficial del nuestru idioma que s’entama coincidiendo col Día de les Lletres. Uviéu va ser tamién l’escenariu d’esta nueva movilización ciudadana pola oficialidá que la Xunta, convocante d’entrambos eventos, per boca’l so voceru Xulio Casado espera “que tanto nel conciertu como na manifestación la respuesta seya masiva nun momentu nel que fai falta amosar el compromisu col futuru de la llingua”.