La Xunta diz qu’Areces y Fernández “mienten” nes sos declaraciones sobre la oficialidá

28 febreru 00:21 2007 Imprimir

La Xunta pola Defensa de la Llingua entiende qu’Areces y Fernández mientes nos sos argumentos contra la oficialidá. L’asociación de defensa de los derechos llingüísticos emitió un comunicáu nel que s’asegura qu’el presidente asturianu y el secretariu xeneral de la FSA-PSOE, Vicente Álvarez Areces y Javier Fernández respectivamente, tán mintiendo nes sos declaraciones sobre l’asturianu.

Dende la XPDLLA consideren que nun se puede entender que “los cabezaleros máximos del partíu socialista n’Asturies se definan como protectores de la llingua al tiempu que rellacionen oficialidá con imposición”; la Xunta denuncia la contradicción coles tesis qu’el PSOE vien defendiendo nos demás territorios billingües del estáu, nos que gobierna y nos que la llingua propia ye oficial.

La Xunta pola Defensa de la Llingua considera que los responsables máximos de PSOE y Gobiernu asturianu han saber “de sobra que nun ye posible garantizar la sobrevivencia d’una llingua na nuesa sociedá si nun tien validez xurídica y s’iguala en derechos a les otres llingües oficiales”. La organización pro-derechos llingüísticos entrugase “¿como puen dexar que’l so usu siga siendo illegal y ensin validez xurídica?”.
La Xunta denuncia que los “dirixentes de la FSA tán en contra de la oficialidá porque tán en contra de la llingua asturiana”, actitú que la Xunta pola Defensa de la Llingua considera visibilizada n’aiciones como ·la prohibición del usu del asturianu nes alministraciones, pasos atrás na situación del idioma na enseñanza, la puesta en funcionamientu d’una canal pública de televisión qu’ignora la esistencia de la llingua asturiana”.

La Xunta recuerda a los dirixentes de la FSA-PSOE la proposición non de llei referida a la protección y puxu de les llingües propies de les diferentes Comunidaes Autónomes, na qu’en pallabres de la Xunta se recueye la definición más clara de los que significa la oficialidá.

El PSOE presentó n’avientu una proposición nel Congresu na que se defende que la cooficialidá de les llingües favorez la convivencia

  Categories:
Loading Facebook Comments ...