Portada Educación La Xunta denuncia que’l colexu La Milagrosa d’Uviéu oculta la información pública pa la matriculación d’asturianu

La Xunta denuncia que’l colexu La Milagrosa d’Uviéu oculta la información pública pa la matriculación d’asturianu

by asturnet

La Xunta pola Defensa de la Llingua Asturiana acaba denunciar un casu nuevu d’ataque a la llingua asturiana nel sistema educativu, que “vuelve evidenciar la precariedá llamentable y la situación d’allegalidá na que s’atopen los derechos llingüísticos y educativos n’Asturies”.

Según delles denuncies feches por dalgunos padres a la Xunta pola Defensa de la Llingua Asturiana, “nel colexu La Milagrosa, nel conceyu d’Uviéu, tán negándo-yos el derechu de matricular a los fíos na asignatura d’asturianu con mentires qu’incumplen la llei y con ocultaciones de les informaciones asoleyaes pa les matriculaciones. Como, por exemplu, nun dexar que puean facelo nun cursu si nun lo ficieren nún anterior, lo que va contra la circular que se mandó dende la Conseyería d’Educación qu’aclaraba que sí podía facese.

Según la Xunta, ye pregrave que nesti colexu se te dando la información interesada de que les clases d’asturianu nun son pa los colexos concertaos sinon pa la enseñanza pública, lo qu’incumple la llei qu’afita l’enseñu d’asturianu tanto pa los colexos públicos como pa los concertaos y qu’obliga, nos dos casos, a la ufierta pública de matriculación.

La Xunta pola Defensa de la Llingua va facer llegar bien llueu esta denuncia a la Conseyería d’Educación pa que tome cartes nel asuntu y s’igue esti casu tan grave de violación de derechos llingüísticos y educativos. Amás, ye preocupante’l papel que desempeña la inspección de la Conseyería porque ye raru’l día que nun llega a la Xunta pola Defensa de la Llingua dalguna denuncia o quexa por parte de los padres nel periodu de matriculación. Añu tres añu venimos teniendo que denunciar situaciones como esta, que se repiten sistemática y xeneralizadamente ensin que la Conseyería d’Educación faga nada por garantizar el cumplimientu de la llei.

Nel mes de febreru pasáu la Xunta pola Defensa de la Llingua Asturiana convocaba una movilización pa denunciar la precariedá de l’asignatura que cuntó col apoyu unánime de tolos sindicatos d’enseñanza y que, por desgracia, volvió chocar cola indiferencia absoluta de la Conseyería d’Educación.

Agora, tres la presentación d’una campaña gubernamental p’afalar a la matriculación na asignatura d’asturianu, la Xunta pola Defensa de la Llingua Asturiana quier recordar que la primer campaña que habíen facer ye la del cumplimientu de la llei, garantizando que toos aquellos que quieran cursar l’asignatura d’asturianu puedan facelo ensin llimitaciones nin coacciones: que s’ufierte l’asignatura en tolos centros, en tolos niveles y pa tolos escolinos y escolines.

Pala Xuntra , “nun ye tolerable que na Asturies del sieglu XXI se siga prohibiendo estudiar y conocer la llingua propia a miles d’estudiantes de toles etapes que lo piden voluntariamente”.

Tamién te podria gustar