Portada Uncategorized La Xunta denuncia que l’asturianu sigue reculando na RTPA pola xestión de Virgili

La Xunta denuncia que l’asturianu sigue reculando na RTPA pola xestión de Virgili

by redacción asturnews
Antonio Virgili, director de la RTPA

La Xunta pola Defensa de la Llingua Asturiana (XDLA) vieno acabante denunciar esti vienres que l’asturianu sigue reculando en RTPA cola xestión d’Antonio Virgili, como amuesa’l fechu de qu’estes navidaes nun s’emitiera programación infantil n’asturianu o que nel 2018 nun se doblara nin un solu minutu al nuestru idioma.

La Xunta pola Defensa de la Llingua Asturiana (XDLA) denuncia esti día nuna nota de prensa acabante asoleyar qu’esta navidá TPA “siguió afondando nos prexuicios ideolóxicos de la so dirección y sigue ensin facer un apueste pola emisión de conteníos doblaos al asturianu. Asina, mentes les demás cadenes autonómiques del Estáu emitieron programación infantil na llingua de la comunidá y doblaron películes como ‘Astérix, la residencia de los dioses’ o ‘Paddigton’ al so idioma, la televisión asturiana fixo tolo contrario y emitió la versión en castellanu”.

La nuestra televisión pública vuelve asina a convertise, pala Xunta, “nun casu únicu ente les televisiones autonómiques del Estáu, amás d’incumplir la llexislación vixente, que diz que la cadena tien que promocionar el nuestru idioma. TPA discrimina l’asturianu, malgasta recursos públicos y nun crea puestos de trabayu al emitir estes películes infantiles en castellanu dando un pasu más na discriminación hacia la nuestra llingua llevada alantre pola dirección encabezada por Antonio Virgili”.

Mesmamente, según se desplica llargamente na nota de prensa de la organización de defensa del idioma, a lo llargo del 2018 diéronse pasos p’atrás nel yá curtiu usu del nuestru idioma que faen los medios públicos: “De mano, yá nun hai partíos n’asturianu nin en RPA nin en TPA, dalgo qu’enantes se facía una vez al mes -nun vaiga ser qu’emitiéndolos toles selmanes quedara claro que l’usu del nuestru idioma ye dalgo normal-. Per otru llau, no que tien que ver col doblaxe, esti añu nun se dobló nin un minutu al nuestru idioma. Too ello a pesar de que’l doblaxe tendría que ser un exe estratéxicu de la normalización llingüística, amás d’una importante fonte de trabayu pa los actores asturianos”.

Otra manera, los programes n’asturianu emitíos a lo llargo d’esti añu puen contase colos deos d’una mano y emítense a cuentagotes con temporaes más curties que los espacios en castellanu y eso que nun cuenten como programación n’asturianu gales musicales onde too val y predomina lo cutre, nin formatos culturales rotulaos n’asturianu pero onde’l castellanu ye la llingua vehicular.

No que tien que ver cola radio, RPA ye una emisora que dexa de llau la nuestra llingua y tamién la nuestra música, “porque raru ye’l día nel que na cadena pue sentise un cantar n’asturianu, mesmo nos fines de selmana, onde más del 60 % de la emisión ye una radioformula dominada polos cantares en castellanu y n’inglés. El restu de la selmana, 10 minutos de llunes a vienres: 50 minutos a la selmana na única emisora de radio pública d’Asturies. Una situación que tendría que poner coloraos a los sos xestores y a los políticos de la Xunta Xeneral que callen énte esta situación”.

Y ye que RTPA, pala Xunta, “sigue siendo’l güertu particular d’Antonio Virgili, qu’incumple día a día l’Estatutu d’Autonomía, la Llei d’Usu y la mesma Llei de RTPA, qu’esplicita que la cadena tien que ser una ferramienta pa promocionar l’asturianu. Sicasí, RTPA ye un duernu pa cuatro, un duernu que pagamos toos y toes y que sufrimos tolos díes los que tovía tenemos gracia pa sintonizar la canal. Antonio, nós nun te queremos”.

Tamién te podria gustar