La Xunta defende la continuidá de los conseyos de la Mocedá d’España y Asturies

14 ochobre 10:57 2013 Imprimir

Partíu Popular y UPYD votaron esta mañana en contra de la Proposición Non de Llei d’IX que demandaba’l caltenimientu del Conseyu de la Mocedá d’España y el d’Asturies, esto ye, los dos partíos tán a favor de suprimir esti órganu de participación xuvenil. Magar la posición d’estos dos partíos, la Proposición Non de Llei d’IX salió alantre colos votos de la coalición, los de Foro Asturies y el PSOE.

Marta Pulgar, diputada d’IX na Xunta Xeneral, amosó esta mañana’l “fondu desalcuerdu” cola intención del Gobiernu del Estáu de suprimir el conseyu de la Mocedá d’España, institución que demientres más de 30 años contribuyó a la promoción del asociacionismu y la participación de los y les moces, según la so representación ante los distintos poderes públicos. De la mesma, la Proposición Non de Llei recueye la demanda de que’l Gobiernu rectifique y caltenga la institución cola configuración xurídica y la organización interna orixinaries, como garantía de los fines pa los que foi creáu’l Conseyu de la Mocedá d’España.

Esta Proposición Non de Llei tamién implicaba’l compromisu de los diputaos asturianos col caltenimientu y afitamientu de les estructures públiques de participación xuvenil del Principáu d’Asturies y encamentaba al Conseyu de Gobiernu a caltener esi compromisu col Conseyu de la Mocedá del Principáu d’Asturies.

“L’anunciu de la próxima desapaición del Conseyu de la Mocedá d’España de resultes de la decisión unillateral del Gobiernu constitúi non yá una pésima noticia, sinón un fondu erru qu’alloña a España del modelu de representación xuvenil de los países de la nuesa redolada”, alvirtió Marta Pulgar.

La diputada recordaba que la creación del Conseyu de la Mocedá d’España favoreció’l desenvolvimientu del asociacionismu xuvenil y sirvió pa que, de manera paralela a la estructuración institucional del Estáu, fueren creándose los conseyos de mocedá de les distintes comunidaes autónomes colos mesmos fines y oxetivos utilizando idéntiques blimes xurídicu institucionales, “blimes que se basaben na idega esencial de l’autoorganización de los y les moces al traviés de les sos asociaciones. “En toos estos años d’esistencia, el Conseyu de la Mocedá d’España tuvo un ampliu protagonismu, alzándose como l’interlocutor más válidu de la mocedá ante los distintos gobiernos, treslladando la so sensibilidá y sentir nos problemes que-yos aquexen”, esplicó Pulgar.

  Categories:
Loading Facebook Comments ...