La Xunta d’Escritores echa una güeyada a los otros territorios que tienen al asturianu como llingua propia

02 marzu 10:02 2012 Imprimir

La Xunta d’Escritores Asturianos 2012 dedicará la xornada del vienres 2 de marzu a la situación oficial del asturianu fuera les llendes alministratives de la Comunidá Autónoma del Principáu d’Asturies. Asina presentaráse’l llibru “El patrimonio lingüístico cántabro” editáu pol Gobiernu de Cantabria en collaboración con ADIC, l’Asociación pa la defensa y los intereses de Cantabria que pretende sirvir de pauta o llibru de trabayu nel sistema educativu pal enseñu de la llingua na comunidá vecina. Ismael García Carmona, presidente del OSCAC, Órganu de Siguimientu y Coordinación del Estremeñu y la su Cultura, una recién asociación de defensa y fomentu del asturianu d’Estremadura o estremeñu, presenta pa la XEA 2012 una interesante ponencia sobre “L’estremeñu y la su literatura”. Darréu d’ello, la XEA ufierta un Alderique abiertu sobre la situación oficial y real de la llingua asturiana fuera les llendes alministratives del territoriu d’Asturies d’anguaño.

Amás, Evaristo Martínez-Radío ufiertará una disertación sobre la llucha de los asturianos escontra los exércitos de Napoleón nel periodu 1808-1812, a partir de les 16,30 de la tarde. Evaristo Martínez-Radío ye Doctor n’Hestoria y profesor d’Hestoria de la UNED. Ye un reconocíu espertu na hestoria política y militar d’Asturies y en 2007 recibió’l Premiu Patac d’ensayu por un trabayu sobre la Guerra d’Independencia n’Asturies.

Programa de los dos caberes xornaes de la Xunta d’Escritores Asturianos 2012

VIENRES 2 MARZU

– 16 h. Presentación de la obra narrativa de Xuan Carlos Crespos Lanchas y alcuentru col públicu sobre’l so procesu creativu.

– 16,30 h. Ciudadanos asturianos escontra Napoleón, por Evaristo C. Martínez Radío.

– 17,30 h. Presentación del llibru “El patrimonio lingüístico cántabro”, Goviernu de Cantabria – ADIC.

– 18 h. L’estremeñu y la su literatura, por Ismael García Carmona.

– 19 h. Alderique sobre la situación de la llingua fuera les llendes alministratives de la Comunidá Autónoma del Principáu d’Asturies.

LLUNES 5 MARZU

– 17 h. El cultivu del maíz nel conceyu de Xixón, por Beatriz Rato Rionda.

– 17,30 h. Política y arqueología: Roma, godos y Reyes Católicos, la santísima trinidad de la historiografía centralista, por C. J. de la Sala González.

– 18, 30 h. Cine y literatura, la traición necesaria, por Miguel Losada, Director de la Sección de Cine del Ateneo de Madrid.

– 19 h. Mesa redonda sobre la situación del cine n’Asturies. Intervienen: Alfonso S. Suárez, Sofía Menéndez, Geno Cuesta, Juan Gona y Miguel Losada

– 20 h. Pieslle de la Xunta d’Escritores Asturianos 2012.

  Categories:
Loading Facebook Comments ...