La Xunta d’Escritores Asturianos dedica la so xornada cabera al cine

05 marzu 10:02 2012 Imprimir

La Xunta d’Escritores Asturianos 2012 retoma la so actividá dempués de les dos xornaes celebraes la selmana pasada. La biblioteca d’El Campu San Francisco d’Uviéu acueye les conferencies y la mesa redonda que va dedicase al cine. La escritora xixonesa Beatriz Rato Rionda falará del “Cultivu del maíz nel conceyu de Xixón” a les 17 hores.

Beatriz Rato ye llienciada en Filoloxía Hespañola y llueu d’exercer dellos años como profesora anguaño ye funcionaria del Ministeriu de Xusticia. La so vocación lliteraria amosólola cola publicación de varios llibros en llingua asturiana: Vida cotidiana urbana n’Asturies, Recetes llambiones, El cultivu del maíz nel conceyu de Xixón, y llibros de lliteratura infantil como Apuros na playa o Hestories d’un bolígrafu.

El cultivu del maíz nel conceyu de Xixón, ye un llibru espublizáu hai un par d’años onde incorpora un trabayu de campu fechu nos pueblos onde llabradores xixoneses rellaten en primer persona les esperiencies directes nel cultivu del maíz y la gran importancia d’esti llabor na so vida diaria, nel ociu, trabayu, alimentación y cultura.

Más tarde, l’hestoriador Carlos de la Sala falará de les estreches rellaciones ente política y arqueoloxía esistentes n’Asturies pa desenmascarar toa una política oficial de deconstrucción de la singularidá asturiana cultural ya histórica mediante una conferencia que tien por títulu “Política y arqueoloxía: Roma, godos y Reyes Católicos, la santísima trinidad de la historiografía centralista”. Carlos de la Sala ye un destacáu investigador y conocedor de la realidá arqueolóxica n’Asturies, destacando pola so defensa de los yacimientos asturianos y denunciando les atrocidaes cometíes en munches escavaciones como en Veleya, Cellagú o na Campa Torres de Xixón, denunciando el romanismu y godismu que quieren implantar dende estamentos oficiales pa ñega-y a Asturies toa singularidá histórica, pretendiéndo asimilala al del restu la península ibérica. Carlos de la Sala suel publicar los sos estudios y consideraciones nos blogs y redes, calteniendo gran difusión.

Pa finar la xornada va tener llugar la Mesa Redonda sobre la “Situación del cine n’Asturies” siguirá darréu de la intervención de Miguel Losada cola participación de los productores Juan Gona, de Porducciones Gona, Geno Cuesta de Blaster Televisión, Sofía Menéndez de Hi-Video Producciones, y el director Alfonso Suárez.

  Categories:
Loading Facebook Comments ...