La Xunta convoca una manifestación pal sábadu 7 escontra la esclusión de la llingua nel sistema educativu

by asturnet | febrero 17, 2009 4:52 am

La Xunta pola Defensa de la Llingua Asturiana convoca una manifestación el próximu sábadu 7 de marzu a les 17:00 contra la esclusión de la llingua asturiana nel sistema educativu.

L’intentu d’eliminación de la llingua asturiana nos planes d’estudiu de la Escuela de Maxisteriu y la situación irregular y illegal na que s’atopen los docentes y l’asignatura d’asturianu obliguen a la movilización na defensa de los derechos llingüísticos y educativos énte unes agresiones qu’amenacen con un retrocesu de más de 10 años na enseñanza de la llingua.

Nos últimos díes, la dirección de la Escuela de Maxisteriu de la Universidá d’Uviéu llevó a votación la so propuesta pa los nuevos planes d’estudios adaptaos al plan européu de Bolonia. La propuesta que foi refugada na Xunta d’Escuela por una mayoría amplísima diba acabar cola presencia de la llingua asturiana nos estudios de Maxisteriu, dexando ensin posibilidá de formación a los futuros mayestros d’asturianu.

Agora la Dirección de la escuela de Maxisteriu tien de facer una nueva propuesta que s’acepte na Xunta d’Escuela. Pel momentu nun se conoz plan alternativu, pero el silenciu per parte de la dirección oblíganos a movilizanos na defensa d’unos planes d’estudiu qu’han incluyir: una mención de Llingua Asturiana que substituya al títulu actual d’Espertu en Llingua Asturiana; y les asignatures comunes de llingua asturiana nes especialidaes d’Educación Primaria y Educación Infantil que garanticen a tolos docentes la formación imprescindible pa trabayar na realidá sociollingüística de les escueles d’Asturies.

Amás d’esto, la sentencia del Tribunal Supremu que califica d’illegales a les plantíes funcionales de docentes, dexa nun limbu llegal a los mayestros y mayestres de llingua asturiana qu’hasta agora exercíen dientro d’esi formatu.

Ye necesario que se dignifique y normalice la situación llaboral irregular de los mayestros d’asturianu, que-yos reconozan los mesmos derechos y deberes qu’al restu docentes, y que se cumpla la llei que reconoz que los escolinos y escolines qu’estudien asturianu van tener la mesma formación que los demás y que nunca llegó a aplicase na enseñanza secundaria. L’asignatura de llingua asturiana ye parte del currículu y polo tanto debe tener la so propia especialidá, igual que’l restu materies que s’imparten n’escueles y institutos y ha ponese clase nes mesmes condiciones. La non creación d’esta especialidá solo podría significar una cosa, la intención de les alministraciones de caltener l’asignatura nuna posición marxinal y inestable que permita la so eliminación nun futuru próximu.

Source URL: http://asturnews.com/la-xunta-convoca-una-manifestacion-pal-sabadu-7-escontra-la-esclusion-de-la-llingua-nel-sistema-educativu/