Portada Educación La Xunta considera que l’aministración ta obligada a pronunciase sobre l’informe del Conseyu d’Europa

La Xunta considera que l’aministración ta obligada a pronunciase sobre l’informe del Conseyu d’Europa

by asturnet

Nunes declaraciones feches tres la publicación del informe del Conseyu d’Europa Xulio Casado, portavoz de la Xunta pola Defensa de la Llingua Asturiana, declaró esti llunes que “nun ye la primer vez qu’instituciones o organismos europeos s’esmolecen pola situación de desamparu na que vive l’idioma propiu d’Asturies”.

Nesti informe compárense les situaciones de les llingues minorizaes qu’esisten nel estáu y rescamplen les diferencies ente les que gocien del estatus de llingues oficiales y les que nun lu tienen. Nel casu de la llingua asturiana, faise mención esplícita a la falta d’información apurrida dende l’alministración del estáu y al peligru grave de desapaición si nun se tomen decisiones series en tolos terrenos, dende’l marcu llegal hasta la presencia nos medios, rotulación, traducción de documentos, facilitación del usu, escolarización.

Faciendo mención al conteniu del informe, el portavoz de la Xunta dixo que “nos puntos 11, 112 y 113 del documentu tíren-y de les oreyes a l’alministración por nun apurrir siquiera los datos solicitaos pol Conseyu d’Europa lo que, como afirma testualmente l’informe, amuesa la falta absoluta de interés de l’alministración y, lo que ye peor, la inhibición sobre’l compromisu adquiríu de tomar midíes urxentes y firmes pa la normalización de la llingua. Lo mesmo podemos dicir sobre los puntos 114 y 115 onde se trata de los problemes detectaos pol Conseyu na revitalización del gallego-asturianu”.

Como conclusión al análisis de la publicación del documentu, Xulio Casado quixo amestar que “lo menos que pueden facer los gobiernos asturianu y español ye responder a unes acusaciones pergraves que-yos tán faciendo dende les instituciones europees” y amestó que “ensin una alministración que faga por defender al asturianu, el so futuru ta completamente comprometíu y l’aministración asturiana y española tienen una reponsabilidá pergrande como ta acabante asoleyar esta institución europea”.

Casado comentó pa rematar que la Xunta pola Defensa de la Llingua Asturiana va volver a ponese en contactu col Conseyu d’Europa p’apurrir tola información qu’amuesa’l flagrante incumplimientu de la regulación europea en materia llingüística.

Tamién te podria gustar