La Xunta abandona l’encierru nel Rectoráu coincidiendo cola concentración convocada esti martes

La Xunta pola Defensa de la Llingua Asturiana, y la so estaya de mocedá Xunta Moza, decidieron a la una de la tarde d’esti martes primeru de xunetu abandonar l’encierru que calteníen dende la selmana pasada coincidiendo cola concentración de sofitu edificiu hestóricu del Rectoráu de la Universidá d’Uviéu. La concentración entamaba a les 12:45 hores, delantre del propiu edificiu del Rectoráu, y quince minutos depués aplaudía la fin del encierru, que se peslló cola llectura d’un comunicáu.

La movilización yera un actu de protesta pa desixir la equiparación del asturianu al restu de llingües nos estudios de la facultá de filoloxía, refugando la retrogada decisión del martes pasáu qu’eliminaba la llingua asturiana de la estructura d’estudios de la mencionada facultá.

Cola concentración los estudiantes encerraos y la Xunta queríen mandar el mensaxe claru de qu’esti encierru y la concentración “”nun son más que l’entamu d’una riestra de movilizaciones, amosando asina, tanto los estudiantes como la Xunta pola Defensa de la Llingua Asturiana, la so intención de caltener la presión sobre’l Rector Vicente Gotor pa que plantegue una solución a esti problema”.

El Rector averóse tres del encierru a falar con dellos de los protagonistes del mesmu y afitó otra vuelta que va facer los posibles por retomar la situación, pero dende la feble perspeutiva cola que vien falando estos díes d’un compromisu que paez más bien papel moyao.