La XPDLLA anuncia’l lema pa la manifestación del próximu Día de les Lletres Asturianes

La Xunta pola Defensa de la Llingua Asturiana ta acabante convocar, como cada añu, la manifestación pola oficialidá del Día de les Lletres Asturianes, que nesta ocasión va celebrase l’8 de mayu, a partir de les siete de la tarde y con salida na Estación del Norte d’Uviéu. El lema escoyíu n’esta ocasión ye “Agora tenemos la palabra, l’asturianu llingua oficial”, col que la Xunta quier destacar “el valor insustituíble del nuesu patrimoniu llingüísticu y la so importancia central na construcción del futuru d’Asturies”.

Los responsables de la XPDLLA camienten que’l movimientu de reivindicación llingüística consiguió va trenta años “acutar un día del calendariu nel que la llingua asturiana sería la protagonista, un día nel que destacamos, un día nel que reivindicamos los mesmos derechos llingüísticos que disfruten cuantayá’l restu ciudadanos del Estáu”. Recordando que “venimos sufriendo una clase política acomodada nes instituciones, despreocupada, irresponsable y belixerante que vien faciendo tolo posible por anular cualquier mínimu avance na dignificación y normalización de la llingua asturiana”.

Per otru llau, y según el manifiestu col que faen un llamáu a la manifestación “la sociedá civil vien dando muestres clares de qu’hai una mayoría amplia y plural que siente apreciu por esti idioma”. Una movilización ciudadana qu’exemplaricen enl casu de “los intentos d’esclusión del asturianu na Escuela de Maxisteriu” na que “una mayoría amplísima de docentes y representantes d’alumnos non solo evitó la desapaición de les titulaciones de llingua asturiana sinón que foi quien a incorporales la vez primera dientro los nuevos planes d’estudiu”.

A les puertes d’una nueva reforma del Estatutu d’Autonomía d’Asturies la XPDLLA ve “necesario dar otru pasu y llograr el reconocimientu del asturianu como llingua oficial”.