La XPDLA denuncia que PSOE ya IX incumplen l’alcuerdu d’investidura na convocatoria de places directives de RTPA

La XPDLA denuncia que PSOE ya IX incumplen l’alcuerdu d’investidura na convocatoria de places directives de RTPA
17 xunu 11:46 2016 Imprimir

Nun duru comunicáu asoleyáu esta mañana, la Xunta Pola Defensa de la Llingua (XPDLA) denuncia que PSOE ya IX tan incumplendo l’alcuerdu d’investidura na convocatoria de places directives de RTPA, amosando tar “más enfotaos en repartir los puestinos y los sueldos que xenera la RTPA, ensin da-yos más l’idioma, la cultura, nin el futuru del sector audiovisual asturianu”.

Sigún desplica la Xunta Pola, el 10 de xunu pasáu publicáronse en rtpa.es les bases pa la selección de directivos nuevos, concetramente, el director d’Informativos y Deportes, director d’Antena y director de Medios Dixitales. Sicasí, “nin nos llabores encomendaos ta la normalización llingüística nin se valoren nos méritos los conocimientos de la realidá llingüística asturiana. Ye una situación que choca col alcuerdu d’investidura, aprobáu colos votos de la FSA y d’IX, onde s’estableció que RTPA diba facer medrar la presencia de la llingua y cultura asturiana na programación. Agora, un añu depués, estos partíos parecen más enfotaos en repartir los puestinos y los sueldos que xenera la RTPA, ensin da-yos más l’idioma, la cultura, nin el futuru del sector audiovisual asturianu”.

Trés puestos directivos son los que se reparten y, casualmente, sigún asoleya la Xunta “trés foron los partíos -FSA, PP y IX- qu’apoyaron, en payares del 2015, qu’Antonio Virgili -alies “el partidariu del asturianu”- siguiera nel puestu de director xeneral de RTPA. Nesi momentu, Gaspar Llamazares anunció que nun taba d’alcuerdu del too cola xestión de Virgili, pero que diba haber negociaciones pa cambiar los demás directivos pa que RTPA recuperara “la so identidá asturiana”. Amás, n’avientu del 2015 aprobóse un plan de dignificación del asturianu que tamién esplicita que RTPA tien que facer medrar los conteníos nel nuestru idioma. El plan aprobóse colos votos de FSA, Podemos Asturies, IX y Foru. Nada sabemos del Plan de Dignificación”.

Na Xunta pola Defensa de la Llingua dicen que tampoco nun saben nada de Xenaro Alonso, el conseyeru de Cultura, qu’en sede parllamentaria afirmó que diba facer que RTPA empezara a normalizar l’asturianu: “Sicasí, vemos les últimes estrenes de la TPA -La batalla de los pueblos y El picu- y nun parez qu’Alonso fixera muncho nesi sentíu, anque nos creitos finales d’El picu aparez el logotipu de la so Conseyería… Esmoleznos ver les promeses incumplíes de los políticos pa tolo que tien que ver cola nuestra llingua y esmoleznos ver que la radiotelevisión pública namás interesa pal repartu de comederos y de porcentaxes d’emisión en TPA Noticias. Esmoleznos muncho porque lo que tán faciendo equí ye lo que se fixo en Madrid y en Valencia: usar los medios públicos pa repartir poltrones y perres, mentes televisión y sociedá se daben el llombu. Los resultaos ehí tán”.

  Categories:
Loading Facebook Comments ...