Portada Comunicación LA XPDLA considera que la Delegación del Gobiernu quier desaniciar los pocos avances na normalización

LA XPDLA considera que la Delegación del Gobiernu quier desaniciar los pocos avances na normalización

by redacción asturnews
Captura de la Web de la Xunta Pola Defensa de la Llingua

La Delegación del Gobiernu español n’Asturies, a instancies de los conceyales del PP de Carreño, acaba de pidir a esti Conceyu qu’anule’l Plan de Normalización Llingüística qu’aprobó nel mes de xineru pasáu y darréu d’ello la Xunta pola Defensa de la Llingua camienta que lo que quier ye desaniciar los pocos avances que se llograren na normalización social.

Básase pa eso, sigún diz nuna nota de prensa, “nun informe xurídicu disparatáu que l’actual delegáu en funciones, Gabino de Lorenzo, encargó a una dirección xeneral del Ministeriu de Facienda y Alministraciones Públiques que tien como función la fiscalización y xestión financiera de les propies Delegaciones”. Ye un testu deliriante pala Xunta  y “ridículu no alministrativo y no xurídico, que busca fundamentos onde nun hai. Hai que recordar qu’un Plan de Normalización ye un programa políticu y non una norma xurídica, polo que ye absurdo impugnalu”.

Los xuristes qu’ellaboraron l’informe paez que desconocen la llei, na opinión de la XPDLA porque si non “nun s’esplica que pueda dicir que los Conceyos nun puen facer política llingüística y qu’eso namás ye cosa del ámbitu autonómicu. Ye más: los Conceyos lleven años faciéndola (y con toles de la llei, porque ye competencia tamién d’ellos, igual que se faen planes municipales d’Igualdá o de Dependencia o de Drogues). Munchos tienen Servicios de Normalización financiaos pol Principáu d’Asturies y aprobaron Ordenances d’Usu del Asturianu por unanimidá de tolos grupos políticos”.

¿A qué situación absurda nos lleva una actuación como la del señor De Lorenzo? La entruga ye retórica y respuente la mesma asociación de defensa del idioma: “Namás se pue entender formando parte de la campaña antiasturiana na que s’embarcó últimamente’l PP d’Asturies. Ta malo d’entender esta deriva persecutoria y supremacista contra les poques coses que s’intenten facer por visibilizar al asturianu, si nun ye porque tean intentando tapar la corrupción y los fracasos electorales averándose a los sectores más ultres y intransixentes”.

Por eso piden, dende la XPDLA, firmeza a la corporación de Carreño nel mantenimientu y cumplimientu del plan, y que tome toles midíes xurídiques pa defendese de l’agresión del Delegáu del Gobiernu en funciones.

De la mesma manera, “el Gobiernu asturianu nun pue quedar implasible énte esta agresión. Tien que defender la so llexislación básica y a los sos conceyos delantre d’estos grupúsculos partidarios d’una Alministración del Estáu centralista y enemiga del futuru de los idiomes minorizaos como l’asturianu”.

Tamién te podria gustar