La XDLLA denuncia illegalidaes nos colexos concertaos

06 08:45 2014 Imprimir

Dende l’aprobación nel mes d’agostu pasáu del currículu d’educación primaria, l’adopción de la posibilidá de que les families escoyeren ente Llingua Asturiana y Cultura Asturiana sufrió bien d’ataques de sectores contrarios a la presencia del asturianu nel mundu educativu. Dalgunos, amplificaos pola prensa, respondíen a los intereses de mui poques persones y nun reflexaben una preocupación real de la sociedá.

Según la XDLLA, les declaraciones la selmana pasada de Sandra Ruiz, presidenta n’Asturies de la Confederación Católica Nacional de Padres de Familia y Padres de Alumnos (CONCAPA), “facíen saltar les alarmes de los que lluchamos por defender la llingua asturiana. La presidenta de la CONCAPA enchipábase, dende les páxines del diariu El Comercio, y debaxo del titular “Llingua fracasa en la concertada”, pol pocu ésitu de l’asignatura de Llingua Asturiana énte la so alternativa Cultura Asturiana nesti primer añu d’implantación del currículu nos cursos 1.u, 3.u y 5.u de primaria. Y ilustraba esi fracasu citando dellos colexos privaos, sosteníos con fondos públicos, onde tol alumnáu ta matriculao dafechu en Cultura Asturiana”.

Pa la XDLLA “los datos son reales y l’asuntu ye grave. Porque estos datos confirmen les nuestres sospeches, tantes vegaes denunciaes pola Xunta pola Defensa de la Llingua Asturiana, de que munchos centros privaos manteníos con fondos públicos nun cumplen la llei”.

Sigún desplica la Xunta na nota de prensa asoleyada esti xueves, “una visita a les páxines web d’esos centros, o una llamada ensin más a la secretaría de los que nun ponen esa información on-line, dexa detectar la illegalidá d’esta práctica. En nengún momentu se da a les families la posibilidá d’escoyer ente les dos opciones nin s’informa de la necesidá d’esa elección pela so parte: namás se dexa que se matriculen los sos fíos o fíes y, como nun se manifesta esplícitamente una opción, automáticamente’l centru asígna-yos lo que-yos da pola gana, que ye, evidentemente, Cultura Asturiana”.

Asina ye que namás 8 centros concertaos nuevos “empezaron a impartir Llingua Asturiana esti cursu. Y a esti pasu, cola Conseyería d’Educación mirando pa otru llau, nunca se va algamar la implantación universal de la enseñanza del asturianu en tolos centros y tolos niveles educativos que diz la Llei d’Usu del Asturianu”.

La Xunta pola Defensa de la Llingua Asturiana quier denunciar estos fechos y pide a la Conseyería d’Educación, Cultura y Deporte “que supervise’l procesu d’almisión y matrícula pa detectar les práctiques illegales y les falcatrúes de los colexos pa impidir l’exerciciu del derechu a la elección de Llingua Asturiana poles families y, nesi casu, actúe como con cualquier otru incumplimientu de la llei poles empreses educatives que cuenten con fondos públicos pa la so actividá: pidimos la intervención del Serviciu d’Inspección Educativa, l’apertura d’espedientes informativos sobre l’actividá irregular d’estos centros y, si ye’l casu, la suspensión de los conciertos de los centros que nun cumplan la llei. Señora conseyera d’Educación, Cultura y Deporte: ser un “equipu saliente” nun xustifica la connivencia col fraude y l’incumplimientu de la llegalidá. ¿O quier usté ser recordada como cómpliz de los enemigos de la recuperación de la llingua asturiana?”.

A un plazu más llargu, los responsables futuros de la educación van tener, según la XDLLA, “qu’entamar una campaña institucional p’animar de verdá a les families a escoyer Llingua Asturiana al empezar cada cursu, dictar instrucciones pa garantizar la llibertá de les families a la hora d’optar por esa asignatura y vixilar el so cumplimientu pa evitar illegalidaes como estes que güei denunciamos”.

La Xunta pola Defensa de la Llingua Asturiana fina la so denuncia dexando bien afitao que “va seguir reclamando, a quienquiera qu’asuma les responsabilidaes de llexislar nesti país, la oficialidá del asturianu como marcu llegal pa garantizar espacios de normalidá pa la llingua y l’exerciciu de los derechos llingüísticos de la ciudadanía”.

  Categories:
Loading Facebook Comments ...