Portada Comunicación La XDLA ya Iniciativa critiquen les postures polítiques alrodiu del asturianu na RTPA

La XDLA ya Iniciativa critiquen les postures polítiques alrodiu del asturianu na RTPA

by redacción asturnews
Antonio Virgili, director de la RTPA

Tres de la comparecencia d’ayeri d’Antonio Virigili na Xunta Xeneral, les crítique de les organizaciones de defensa del idioma nun se ficieron esperar por mor de la falta de compromisu de los partíos y de la direcciópn de la cadena por facer cumplir la Llei d’Usu.

La XDLA criticó nuna nota de prensa esta mañana de xueves a Foru y Ciudadanos por mostrase en contra d’aumentar el porcentaxe d’emisión n’asturianu cuando ye dalgo que marca la Llei d’Usu, que tanto dicen defender cuando nieguen la necesidá de la oficialidá

La Xunta pola Defensa de la Llingua Asturiana (XDLA) “pide al director xeneral de RTPA, Antonio Virgili, qu’esplique pa quién ye escesiva la programación n’asturianu qu’actualmente s’emite en RTPA”. Virgili afirmó na Comisión de Control de RTPA na Xunta Xeneral, énte les crítiques de dellos partíos pola poca presencia del nuestru idioma na radiotelevisión pública, que la programación n’asturianu “pa dalgunos ye escesiva y pa otros ye curtia; nós tratamos de buscar el permediu”.

La XDLA recuerda na nota de prensa que la TPA emite menos de cinco hores a la selmana de conteníos nel nuestru idioma, mentes que na RPA l’espaciu pal asturianu queda namás en diez minutos de llunes a vienres. Igual pa Virgili, dicen na nota de prensa, esto ye’l “permediu” y “mesmo podrá haber xente qu’esto-y paeza escesivo, porque la intolerancia dase en tolos llaos. Con too, lo que marquen l’Estatutu d’Autonomía, la Llei d’Usu del Asturianu y la Llei de RTPA ye que la cadena tien que ser una parte activa nel procesu de promoción de la llingua asturiana, polo qu’equí nun val lo que puedan opinar unos o otros: RTPA tien que cumplir cola llexislación vixente”.

De la mesma manera, la XDLA refuga la posición que mostraron Foru Asturies y Ciudadanos nes comparecencies de los miembros nuevos del Conseyu d’Alministración de RTPA: “Precisamente, estos mostráronse a favor de que la cadena cumpliera cola llei no que tien que ver cola emisión de conteníos n’asturianu”, dalgo que criticaron tanto la diputada de Foru Carmen Fernández como la de Ciudadanos, Diana Sánchez, porque “l’asturianu nun ye oficial”.

Pala XDLA “ye chocante qu’estos dos partíos tean en contra de cumplir cola Llei d’Usu, que diz qu’en RTPA tien qu’haber una presencia amañosa del asturianu en toles emisiones, cuando precisamente vienen diciendo que nun ye’l tiempu de la oficialidá porque enantes hai que desenvolver la Llei d’Usu. ¿Nun será que nun quieren nin oficialidá nin Llei d’Usu? ¿Nun será que lo que-yos manca ye la propia existencia del asturianu?”

Iniciativa pide una llinia clara

Dende Iniciativa pol Asturianu, ayeri pela tarde ya dexaron afitada la so posición: “ensin dexar de llau la responsabilidá del director de la RTPA na escasa ufierta de programación n’asturianu de la canal, queremos animar tamién a los verdaderos responsables últimos, los partíos de la Xunta Xeneral, esperando que tomen decisiones y faigan porque la RTPA tenga infraestructura y medios pa usar de forma más intensa l’asturianu”.

Pa ello proponen, “como venimos faciendo dende va años con distintos informes y peticiones, que se cree una dirección específica de conteníos n’asturianu na RTPA, que curie porque la presencia del asturianu vaya medrando de forma tresversal y digna en tolos ámbitos del ente, tanto nos programes d’entretenimientu como nos informativos, cine, programación infantil, deportes y otros formatos”.

Pa Iniciativa son los partíos representaos los responsables últimos de que l’asturianu tenga una presencia amañosa na RTPA, y yá saben qué facer. Yá la Llei d’Usu y Promoción del asturianu aprobada en 1998, falaba de la necesidá de da-y una presencia afayadiza, nel so artículu 13.2. y “la RTPA nun pue siguir considerando al asturianu como un elementu secundariu y qu’apaez de forma folclórica, tien que formar parte del so llabor como serviciu públicu convertise nun ente que promocione y normalice l’asturianu” conclúin.

Tamién te podria gustar