La XDLA refuga la escepcionalidá de reconocer los derechos fundamentales condicionándolos

La XDLA, nuna nota de prensa asoleyada esti domingu, refuga la escepcionalidá de reconocer los derechos fundamentales condicionándolos a la d’esixir una mayoría reforciada de 3/5 de la Xunta Xeneral p’aprobar tamién la llei que la desarrolle la oficialidá.

Pala Asociación de defensa del idioma, “dende qu’Adrián Pumares punxera sobre la mesa’l so votu favorable a la oficialidá cola llimitación d’esixir una mayoría reforciada de 3/5 de la Xunta Xeneral p’aprobar tamién la llei que la desarrolle, ta medrando’l ruxerrux de si podría ser aceptable esa comenencia pal movimientu de defensa de la llingua… Nun lo ye”.

Esa condición equivaldría a conceder capacidá de vetar cualquier desarrollu posterior de la oficialidá a una minoría de 19 votos de los 45 totales lo que la Xunta Pola atalanta nun ye namái que “un estorbu inaceptable pal avance en cualquier otru derechu social, inaceptable tamién pa los derechos llingüísticos”.

Pala Xunta, “supondría pasar d’una escepcionalidá, la falta d’oficialidá del asturianu y del gallegu-asturianu, a otra tanto o más llimitante, duradera y peligrosa pa la recuperación de dambes llingues, la imposibilidá d’aprobar lleis de desenvolvimientu de la oficialidá qu’aseguren el futuru de la identidá llingüística d’Asturies”.

La Xunta pola Defensa de la Llingua Asturiana quier dexar afitao que nun lleva trabayando 38 años “pa terminar entregando’l trunfu de la oficialidá a los enemigos acérrimes de la diversidá llingüística. Vamos siguir lluchando por una oficialidá qu’enconte la normalización y denunciando los intentos de balerala de significáu y aplicación, vengan de quien vengan”.