La XDLA recuerda que la manifestación reclamó la oficialidá nesta llexislatura

La XDLA recuerda que la manifestación reclamó la oficialidá nesta llexislatura
25 abril 09:05 2018 Imprimir

La Xunta pola Defensa de la Llingua Asturiana (XDLA), asociación ciudadana que convocó la manifestación pola oficialidá d’esti sábadu 21 d’abril, vieno acabante felicitase pol éxitu de la convocatoria y recordar que la manifestación del sábadu reclamó la oficialidá nesta llexislatura.

Nuna nota de prensa asoleyada esti martes, la XDLA diz que demostróse bien a les clares el clamor social a favor de reconocer oficialmente unos derechos ciudadanos “que nun tán reconocíos tovía pa los falantes d’asturianu y gallego-asturianu. Como diximos nel discursu final de la manifestación, como parte del movimientu social garremos un testigu de xeneraciones qu’agora apurrimos a los diputaos y diputaes de la Xunta Xeneral. Tóca-yos a los nuestros representantes políticos facer el so llabor y atender pa les demandes de la xente. El momentu ye agora, nesta llexislatura: non l’añu que vien o d’equí a unos años. Nun ye aceptable éticamente ser conscientes d’una inxusticia y, pudiendo facelo yá, esperar a tiempos electorales meyores pa poner fin a esa inxusticia. La manifestación nun foi pa que se tomara nota del apoyu social a la oficialidá. Foi un encargu a les fuercies polítiques partidaries de dar derechos a los falantes d’asturianu y gallego-asturianu pa que lo faigan yá”.

Pa la XDLA’l procesu ye bien fácil: “tamos seguros de qu’esos partíos van poder atopar los 12 diputaos o diputaes necesarios pa que presenten na Xunta Xeneral la propuesta de reforma del artículu 4 del Estatutu. Yá tienen dende va meses la redacción que-yos propunximos dende la XDLA y qu’ellaboremos coles aportaciones y conseyos d’un grupu de xuristes. Faigan depués el debate con lluz y taquígrafos, a la vista de la ciudadanía, y voten. Faen falta 27 diputaos que tean a favor”.

Pal reconocimientu de los derechos llingüísticos nel nuestru ordenamientu xurídicu nun hai términos medios sigúna la XDLA: “una llingua o ye oficial o nun lo ye. O una llingua ye válida llegalmente a tolos efectos o nun lo ye. Y agora, los falantes d’asturianu y gallego-asturianu nun tienen reconocida la validez del so usu. Desque tea reconocíu esi estatus xurídicu d’oficialidá, más alantre, na llexislatura que vien por exemplu, habrá tiempu p’aprobar una Llei de Normalización Llingüística que desenvuelva, col mayor consensu posible y cola aportación de toles fuercies polítiques, sindicales y sociales, cómo va ser na práctica esa oficialidá: la gradualidá, los ámbitos d’actuación, etc”.

La XDLA atalanta que “va ser un trabayu d’años, polo que ye importante ponese a trabayar yá. Llevamos cuatro décades de retrasu y agora, por fin, preséntase la posibilidá real de qu’haya una mayoría na Xunta Xeneral pa llogralo. Por eso, dicímos-yos a los partíos políticos (a toos ensin distinción) y a les instituciones que nun ye’l momentu de ponese de llau y esperar que pase’l tiempu políticu. Ye’l momentu de poner en marcha la reforma estatutaria pa incluyir la oficialidá. Eso ye lo que se reclamó na manifestación d’esti sabadu: que la declaración d’oficialidá tien que ser agora”.

Esti vienres 4 de mayu, la Xunta pola Defensa de la Llingua Asturiana, convoca como davezu la 34.ª manifestación del Día de les Lletres Asturianes. Nella va volver recordase que la reclamación de la oficialidá lleva décades ensin resolvese. Yera bon momentu alredor d’eses feches pa qu’esos 12 diputaos presentaren nel rexistru de la Xunta Xeneral la propuesta de reforma del artículu 4.

  Categories:
Loading Facebook Comments ...