La XDLA pide camudar la dirección de RTPA

La XDLA cieno acabante denunciar otra vuelta que la RTPA sigue ensin cumplir el compromisu marcáu nel Estatutu d’Autonomía y darréu d’ello reclama al Gobiernu y a los grupos parllamentarios que trabayen pa cambiar la dirección de RTPA.

La Xunta pola Defensa de la Llingua Asturiana (XDLA) vuelve denunciar que la RTPA sigue ensin cumplir el compromisu marcáu nel Estatutu d’Autonomía, la Llei d’Usu del Asturianu y la mesma llei de creación de RTPA, qu’establecen que los medios públicos tienen que ser una parte activa nel procesu de recuperación del patrimoniu llingüísticu del país.

Asina, a la falta de conteníos infantiles, d’entretenimientu y de doblaxes al asturianu -que nun existen dende l’añu 2017- en TPA, agora hai que sumar que RPA tuvo más de mes ensin emitir el boletín informativu n’asturianu que dende hai años existía de llunes a vienres a les 12.00 hores. L’espaciu tenía una duración de namás 10 minutos, pero dende’l 7 de mayu hasta’l 14 de xunu nun s’emitió. Hai que recordar tamién que RPA llegó a emitir una vez al mes -imaxinamos qu’una vez a la selmana yera muncho pa la dirección de la emisora- partíos de fútbol n’asturianu. Sicasí, eso tamién desapareció esta llexislatura.

A too esto hai que sumar que la toponimia oficial nun s’usa en RPA y que namás s’emiten conteníos n’asturianu, que puen contase colos deos d’una mano si tán pagaos pola Conseyería de Cultura o si son gratuitos pa la emisora pública. Quier dicise, la radio autonómica ta incumpliendo a les clares l’Estatutu d’Autonomía y tola llexislación que lu desarrolla.

La dirección de RTPA, encabezada por Francisco Orejas, sigue negándose a cumplir cola llexislación y actúa como si TPA y RPA fueren cadenes privaes y monollingües en castellanu. Nun cansamos de recordar qu’ensin el papel activu de la RTPA ye imposible que se cumplan eses frases que tanto repite’l Gobiernu de “salvar l’asturianu” y “recuperar l’arguyu de ser asturianu”. Por eso, nel ecuador de la llexislatura, reclamamos al Gobiernu y a los grupos parllamentarios pa que trabayen pa que se produza un cambiu na dirección de RTPA y acabar cola actitú contra l’asturianu que día a día muestren dende la dirección de RTPA.