La XDLA pide al Gobiernu que controle la toponimia en La Vuelta España

Esti miércoles 11 de xineru conociéronse les etapes de la Vuelta Ciclista a España pa esti añu 2012, con dos llegaes n’Asturies: nos llagos d’Enol y La Ercina (Cangues d’Onís), y nel picu de Cuitunigru (L.lena). Nos medios de comunicación yá s’espardió dende va años la forma ensin base popular “Lagos de Covadonga” pa la primera de les llegaes, pero agora añádese una forma nueva: “Cuitu Negru” o “Cuitu Negro” pa la segunda.

El problema, espliquen dende la Xunta “nun se reduz a los finales d’etapa, sinón que los pasos per otros altos popularicen formes deturpaes como “Alto de San Lorenzo” (San L.lourienzu), “Alto de Tenebredo” (Tenebreo), “Alto de Ortiguero” (H.ortigueru), etc.”

La Xunta pola Defensa de la Llingua Asturiana (XDLA) considera que ye’l momentu de que la Xunta Asesora de Toponimia intervenga énte los organizadores de La Vuelta pa que se respeten los nomes auténticos igual que se fai nes etapes gallegues, catalanes, vasques, etc., porque depués de la popularización nos medios de formes enquivocaes ye mui difícil volver a recuperar les reales, les qu’usó la población local hasta que se fixeron famoses. Si nel casu de L’Angliru se respetó la forma tradicional, nun s’entiende que nel casu de Cuitunigru namás se respeta na primer metá del topónimu.

La XDLA considera “que ye una bona oportunidá de facer llegar a un bon númberu de xente’l valor de la toponimia tradicional asturiana”. De la mesma manera, quieren “animar” a la Xunta Asesora de Toponimia “a completar los espedientes toponímicos de tolos conceyos y ponese a trabayar con otru tipu de topónimos con menos implicaciones llegales o reglamentaries como son los accidentes xeográficos”.