La XDLA pide a Conceyos y Gobiernu “un mayor compromisu cola estabilidá de los Servicios de Normalización” dempués del recorte del 20%

Dempués de que se diera a conocer que pal 2013, el Gobiernu asturianu va recurtiar nun 20% el presupuestu que destina al traviés de tresferencies directes pal mantenimientu de los Servicios de Normalización Lliguïstica (SNL), la Xunta pola Defensa de la Llingua Asturiana (XDLA) pide a los Conceyos que cuenten con un serviciu d’estes característiques “que muestren el so compromisu con estes entidaes y colos puestos de trabayu que xeneren”. Por eso, la organización cultural esixe a les alministraciones llocales “que collaboren cola alministración autonómica pa permitir el mantenimientu de los 14 SNL que actualmente hai n’Asturies”, dalgo que, amás, espliquen “xenera puestos de trabayu directos -alredor d’una ventena- y indirectos -al traviés de la elaboración de materiales pa les campañes de normalización- y permite ayudar a salvar un patrimoniu inmaterial del que ye dueñu tola ciudadanía d’esti país”.

Dende la XDLA, dicen saber “que son tiempos difíciles y que los recortes de les Alministraciones tán afectando a toles estayes, pero ye que lloñe de ser proporcionables, estos recortes tán cebándose con too aquello que tien l’asturianu como llingua d’usu”. Asina, nel 2012, les ayudes del Gobiernu asturianu pa les editoriales, discográfiques, medios de comunicación o asociaciones qu’utilicen el nuestru idioma sufrieron un recorte de más del 60%. “Nun queremos ver nengún intentu d’acabar coles empreses que trabayen en y en beneficiu de l’asturianu, empreses que dende hai dos décades tán faciendo un trabayu de normalización que desdexo’l mesmu Gobiernu asturianu”, protestes. Amás, na so nota de prensa espliquen “Preferimos más pensar que ye un desconocimientu dafechu de la realidá -anque triste ye una Alministración que nun conoz la realidá del territoriu que gobierna- y que nel Gobiernu nun saben que la industria cultural n’asturianu xenera cientos d’empleos directos y indirectos”.

Dirixéndose a los “señores políticos”, recuerden que “l’asturianu nun ye un caprichu culturalista d’unos pocos”, sinón “amás d’una llingua con falantes -polo tanto, persones con drechos-, l’asturianu ye un sector económicu que da de comer a un bon númberu de persones”. Pa la Xunta “nun se pue entender la defensa que faen con una mano d’otros sectores productivos, mentes afueguen cola otra a la industria cultural d’esti país, cuando según tolos estudios, el de la cultura ye ún de los sectores económicos con más proyección de futuru”.

Por too ello, dende la XDLA piden al Gobiernu asturianu “un mayor compromisu y una mayor atención al funcionamientu y estabilidá d’estos servicios, pero sobre too, un mayor compromisu a les entidaes locales, que na mayoría de los casos, a lo llargo d’estos años, nun se comprometieron colos SNL y colos sos trabayadores, importándo-yos bien poco les sos condiciones llaborales y el dotar a los servicios d’un presupuestu propiu”. A la fin, la normalización del nuestru idioma, les campañes a realizar y los puestos de trabayu xeneraos pol SNL, dependíen namás y esclusivamente de les perres que daba’l Gobiernu asturianu y de lo qu’estes durasen, porque una vez acabaes, l’asturianu y los puestos de trabayu, en munchos de los casos, nun importaben a nengún conceyal nin a nengún alcalde, recuerden dende la Xunta.

Otra manera, dempués d’una década desque empezaran a funcionar los primeros SNL, pa la XDLA “sería menester que dende la Dirección Xeneral de Política Llingüística iguaran una figura xurídica que diera estabilidá a estes entidaes, dalgo qu’amás diba permitir una mayor coordinación pa entamar campañes y que diba abaratar los costes de les mesmes”. Y ye que dende hai una década son continuos los zarros a metá del añu de los SNL porque’l Conceyu quedó ensin perres o ye noticia la mesma inestabilidá de los trabayadores, que namás son contrataos hasta final d’añu y que nun saben cuánto tiempu van tar nel so puestu de trabayu, dalgo que tamién impide facer un proyectu normalizador a plazu llargu y con garantíes de ser evaluable.