Portada Comunicación La XDLA llamenta la inorancia de Casado sobro la cultura de nueso

La XDLA llamenta la inorancia de Casado sobro la cultura de nueso

by redacción asturnews
Captura de la Web de la Xunta Pola Defensa de la Llingua

La Xunta pola Defensa de la Llingua Asturiana vieno acabante espublizar esta fin de selmana una nota de prensa na que llamenta fondamente lo qu’atalanten nun ye sinon una exhibición d’inorancia de Pablo Casado sobre l’asturianu.

El presidente del Partíu Popular Pablo Casado cargó contra la oficialidá del asturianu nel actu de presentación de candidatures de la tarde del vienres n’Uviéu. Faló d’una “imposición de la cooficialidá por decretu que naide reclama”. Y sigún la xunta “parez inorar partes esenciales del ordenamientu xurídicu del Reinu d’España: el reconocimientu de la oficialidá nun pue facese por decretu, sinon pela via d’una reforma del Estatutu d’Autonomía, pa la que ye necesaria una mayoría ampliada de tres quintes partes de la representación de la Xunta Xeneral”.

Tamién parez inorar, pala organización de defensa del idioma, que la representatividá que tien el so partíu n’Asturies ye mui inferior a la que tienen los partíos políticos que sí “reclamen” la oficialidá: “nes ultimes elecciones autonómiques el Partíu Popular obtuvo n’Asturies namás 11 diputaos/es con 115.935 votos, mientres que los partíos qu’incluyeron la oficialidá nel so programa electoral obtuvieron 17 diputaos/es (6 más que’l PP) con 210.575 votos (94.640 más que los llograos pol PP). Amás, ye de destacar que, recientemente, partíos como’l PSOE posicionáronse tamién a favor de la oficialidá, configurando una amplia mayoría política, en sintonía cola mayoría social que quier acabar cola discriminación de la llingua asturiana y de los sos falantes”.

La Xunta pola Defensa de la Llingua Asturiana quier pidir al Partíu Popular qu’esplique a los asturianos el motivu pol que d’ente toles llingües del Estáu namás s’oponen a la oficialidá de la llingua asturiana, mientres sí la apoyen en toles demás comunidaes con llingua propia diferente del castellanu: Galicia, País Vascu, Navarra, Cataluña, Valencia y les Isles Baleares.

Piden al Partíu Popular “qu’esplique a los asturianos por qué merecemos menos derechos que los que se reconocen al restu ciudadanos del Estáu. Y si les propuestes del Partido Popular p’Asturies pasen por siguir forzando a la mocedá asturiano a siguir emigrando a eses comunidaes más prósperes onde, precisamente, sí tienen reconocida la oficialidá de les sos llingües”.

Tamién te podria gustar