La XDLA llama a movilizase pola Oficialidá

La Xunta pola Defensa de la Llingua (XDLA) vieno acabante convocar una concentración pa esti xueves 3 de febreru, a les 19:30 hores, alrodiu de la Xunta Xeneral n’Uviéu, a la que se quier arrodiar cola “O” d’Oficialidá. La concentración va presentase esti martes  a les 17 hores na so sede de la cai Cimadevilla 15, escalera A 1° C d’Uviéu.

Na rueda de prensa de güei martes va informase de les característiques de la Concentración pola Oficialidá del xueves 3 de febreru a les 19:30 hores alredor de la Xunta Xeneral. Asinamesmo van dar la so opinión sobre’l procesu de negociación del Estatutu d’Autonomía no que tien que ver col artículu IV onde se regula’l tratamientu de les llingües propies d’Asturies.

Na convocatoria déxase bien a les clares que se va “arrodiar la Xunta Xeneral con una “O” d’oficialidá formada poles banderes qu’enllenaron les cais d’Uviéu nes últimes movilizaciones masives. Y vamos facelo pa recorda-yos a los nuestros diputaos y diputaes que los derechos de les persones falantes d’asturianu y de gallego-asturianu nun son aplazables o recortables. Querémoslos yá. Aquellos partíos que crean na igualdá y na ampliación de derechos tienen que llegar a un alcuerdu ensin más demoranza. Los que queden fuera d’esi alcuerdu o voten en contra van demostrar que tán nel llau de los qu’apuesten pola esclusión y la intolerencia”.

Na opinión sw l XDLA “Tamos viviendo una etapa fundamental nes negociaciones pa que los partíos favorables a la oficialidá alcuerden la reforma estatutaria que por fin reconoza los mesmos derechos a tola ciudadanía, fale la llingua que fale. Esti reconocimientu pudo facese muncho primero: na llexislatura anterior o va cuarenta años, pero nun hubo la valentía nin la responsabilidá política necesaries pa ponenos al altor de les demás comunidaes con llingües propies diferentes del castellanu”.