La XDLA denuncia’l desinterés dafechu de la TPA pola programación infantil n’asturianu

La XDLA denuncia’l desinterés dafechu de la TPA pola programación infantil n’asturianu
29 agostu 11:12 2016 Imprimir

La TPA emitió a primeros d’agostu la segunda temporada de la serie infantil Los Bolechas ensin nenguna promoción, polo que la mayoría de neños asturianos nun s’enteraron y nun pudieron ver esta producción tan importante pa la normalización llingüística. Esa ye la denuncia que facía esta selmana la Xunta pola Defensa de la Llingua asturiana que nun ye a ver la razón d’esi escaecimientu.

“Hai que reseñar la espectación que llevantó la emisión de la primer tanda de capítulos nel 2014, y más teniendo en cuenta les poques esperiencies de programación infantil nel nuestru idioma qu’hubo hasta la fecha. Sicasí, depués d’acabar la primer temporada hubo qu’esperar dos años pa ver capítulos nuevos, lo que dexa a les clares el desinterés de Virgili y compañía por esti productu, pol públicu infantil y pol futuru del nuestru idioma. Si esto nun fora poco pa mostrar esa dexadez de funciones, descubrimos que, depués d’enteranos con gayola de que taben preparando’l doblaxe d’otra temporada, los capítulos emitiéronse ensin nenguna publicidá. ¡Una televisión que nun promociona los sos propios espacios! Ensin dulda, un casu únicu nel mundu” según desplica la XDLA nun comunicáu qu’asoleyaran esta fin de selmana.

Pala XDLA la emisión d’una temporada nueva d’esta serie infantil ensin promoción denguna amuesa la falta d’interés “de Virxili y del so equipu nel audiovisual infantil asturianu. Hai que tener en cuenta que tamos falando d’una cadena que tien un perfil d’audiencia que ta perriba de los cincuenta años, polo qu’esta acción -estrenar una serie ensin avisar a l’audiencia infantil- namás pue tener trés esplicaciones: primero, que los directivos de la cadena nun conocen el mediu que dirixen y nun saben cómo funcionen les audiencies; segundo, que quieren que la serie sía un fracasu, porque nun quieren emitir más conteníos n’asturianu; o tercero, que nun-yos da más l’audiencia: ellos tán ehí pa cobrar el sueldu y poco-yos importa l’audiovisual, los neños y l’idioma. Cualquiera de les trés opciones descalifica a los directivos pa dirixir la cadena y por desgracia camentamos que nesti casu axúntense les trés esplicaciones”.

El resultáu final ye la poca audiencia d’una serie, lo que pue valir a los directivos pa xustificase na so inacción nesi ámbitu de la programación infantil, sigún desplica la nota de la XDLA qu’afonda tamién nel problema fonderu de la situación: ¿Cómo pue tener audiencia dalgo que los asturianos nun saben qu’existe? La situación choca col enfotu que tendría que poner la cadena nuna serie que tendría que promocionar, afalagar y curiar, tovía más teniendo en cuenta que ye un programa pa neños y n’asturianu. Por llei, TPA ta obligada a protexer l’asturianu y a los neños. Vese nos últimos tiempos cómo hai un desinterés en promocionar dellos productos que, chocantemente, siempre son n’asturianu. Parez que s’emiten con desgana, ensin facer ruíu. Otra manera, TPA sigue ensin involucrase n’iniciatives que surden del mesmu Gobiernu asturianu col enfotu de normalizar l’idioma y la so producción cultural. Sicasí, la cadena sí que patrocina, promociona y retresmite’l Concursu Internacional de Saltos de Xixón con un costu estimáu de 20.000€, una iniciativa privada que muestra qué ye lo qu’interesa a los actuales directivos de RTPA. Pa eso, y pa ellos, sí qu’hai perres”.

  Categories:
Loading Facebook Comments ...