Portada Uncategorized La XDLA denuncia que TPA nun ufre nes navidaes conteníos infantiles n’asturianu

La XDLA denuncia que TPA nun ufre nes navidaes conteníos infantiles n’asturianu

by redacción asturnews
Campaña de la Xunta por dibuxos na TPA

La Xunta pola Defensa de la Llingua Asturiana (XDLA) vieno acabante denunciar nun comunicáu asoleyáu esti lunes que TPA dedica cero minutos nes navidaes a los conteníos infantiles n’asturianu, mentantu’l restu de Gobiernos autonómicos trabayen pa llevar les sos llingües a les plataformes audiovisuales.

La Xunta pola Defensa de la Llingua Asturiana (XDLA) denuncia que toles televisiones autonómiques de comunidaes con llingua propia diferente al castellanu dediquen una parte importante de la so programación a emitir una montonera de series y películes d’animación nes sos llingües. Tovía más nes feches navidiegues. Toes menos TPA, que nestes fiestes dedica cero minutos a la emisión de programación infantil n’asturianu.

Amás, TPA emitió nestes feches llargumetraxes pa la reciella como ‘Cigüeñas’ o ‘Batman, la legopelícula’, con un doblaxe al castellanu fecho por empreses madrilanes o catalanes. Quier dicise, TPA dedicó’l so presupuestu a ufrir los mesmos conteníos que puen vese en televisiones como Clan, Boing, Neox o Cartoon Network.

La XDLA quier destacar que nada cambió na radiotelevisión pública nos últimos dos años. Nun hai programación infantil n’asturianu, la toponimia oficial ta marxinada, namás s’emiten programes nel nuestru idioma si paga la Conseyería de Cultura y l’asturianu ta vetao nos programes informativos y deportivos. Too eso a pesar de les palabres bones del Gobiernu actual hacia’l nuestru patrimoniu llingüísticu.

Hai que destacar que mentes el restu de Gobiernos autonómicos trabayen pa llevar les sos llingües a les plataformes de conteníos baxo demanda, equí RTPA nin cumple les sos obligaciones estatutaries y nun atiende al públicu más mozo. L’Estatutu y la mesma Llei d’Usu dicen que los medios de comunicación públicos tienen que tener una presencia “amañosa” de les llingües propies.

Na opinión de la XDLA “los responsables de RTPA y los nuestros representantes públicos tendríen que responder si consideren cero minutos una presencia amañosa del nuestru idioma. Pa iguar esta situación nun fai falta esperar a la oficialidá, namás fai falta voluntá política. Pel momentu, en dos años de llexislatura d’Adrián Barbón la voluntá amosada sigue siendo la mesma que na llexislatura de Javier Fernández: cero voluntá y, en consecuencia, cero minutos”.

Tamién te podria gustar