La XDLA denuncia la RTPA como instrumentu d’una FSA vieya pa incumplir la llei d’usu

La XDLA denuncia la RTPA como instrumentu d’una FSA vieya pa incumplir la llei d’usu
23 mayu 14:01 2018 Imprimir

Nun duru comunicáu nel qu’afita otra vuelta munchos de los sos informes de los años caberos, la Xunta pola Defensa de la Llingua (XDLA) conclúi que la RTPA ye anguaño “un instrumentu d’una FSA vieya pa incumplir una llei d’usu que yá nun val”.

Pala XDLA la RTPA sigue dando’l llombu a la sociedá asturiana con una programación “marcada polos prexuicios ideolóxicos de la so dirección y del conseyeru de Presidencia del Gobiernu d’Asturies, Guillermo Martínez, del que depende RTPA: La televisión pública sigue marxinando los conteníos nel nuestru idioma, l’usu de la toponimia oficial y tratando al nuestru patrimoniu llingüísticu -nos más de los programes-, como una caxigalina que namás val pa facer chancia y pa los conteníos más d’andar per casa. Ye una situación qu’incumple sistemáticamente la Llei d’Usu, a la qu’agora dalgunos tanto s’agarren”.

L’analís que fai la esta organización de defensa del idioma fai alcordanza de que pa falar de programes n’asturianu nun val “dicir un ‘ye’ y un ‘prestoso’ nun discursu en castellanu”. Y por mor d’eso, camienta que “tán baxo mínimos, nes cifres más baxes de magar empezó a emitir. Namás val con mirar la parrilla de programación pa comprobalo y ver que TPA nun ta cumpliendo col so mandáu llexislativu -Estatutu, Llei d’Usu y Llei de RTPA-, que diz que l’asturianu na radiotelevisión pública tien que tener una presencia amañosa”.

Pala XDLA, la televisión asturiana d’anguaño “exerce una discriminación hacia la llingua asturiana: Por poner namás un exemplu ente los munchos qu’hai tolos díes, nuna fecha tan simbólica como’l Día de les Lletres Asturianes, na primer canal de TPA programaron una película doblada al castellanu. Mentanto, una hora más tarde, la segunda canal programa la mesma película doblada al asturianu. Esto, amás de suponer que na cadena tienen programadores poco espiertos que nun entienden que l’audiencia va buscar lo que nun ve n’otros canales -nesti casu una película n’asturianu-, ye un exemplu claru de marxinación y de la idea que tienen los responsables de los medios públicos de priorizar la versión castellana sobre l’asturiana (que se fixera a costafecha pa emitila en TPA)”.

Per otru llau, l’usu de la toponimia oficial sigue incumpliéndose y la RPA sigue asemeyándose a una radio local de Madrid: “ensin presencia nenguna quitando 10 minutos de llunes a vienres del nuestru idioma”. Mesmamente, la Xunta dexa bien a les clares que la emisora pública “nin emite música nel nuestru idioma fuera de la Selmana de les Lletres”. Una desconexón cola realidá cultural asturiana que “fai que güei RPA sía la radio xeneralista con menos oyentes n’Asturies”.

La TPA, conclúi nesti sen la Xunta pola, “quitando poques escepciones que son gotines nuna programación mayoritaria en castellanu -o nun castellanu con interferencies n’asturianu-, sigue marcada pola diglosia y por programes de baxa calidá qu’imiten los programes de les televisiones estatales. Una situación que fai que la sociedá asturiana dea cada día’l llombu a la que tendría que ser la so televisión, que tamién ye la televisión xeneralista con menos espectadores n’Asturies”. La opinión de la XDLA ye que los asturianos nun conecten con RTPA, sinon que, al revés que les demás emisores autonómiques, nun ye referente informativu pa la ciudadanía “nin ferramienta pal sector audiovisual, nin muncho menos un preséu pa la promoción del asturianu. Asina, la radio y la televisión pública incumplen cada día una Llei d’Usu que ta demostrando que nun val”.

La denuncia de la XDLA céntrase nel fechu de que “la FSA vieya, la de Javier Fernández y Guillermo Martínez, y el director de RTPA, Antonio Virgili, mantienen la cadena secuestrada. Ye’l so güertu particular, non la radiotelevisión de tolos asturianos”. Y darréu de too ello, la Xunta pola Defensa de la Llingua espera “un cambiu na política de programación pa que la desconexón qu’existe ente la RTPA y la sociedá asturiana nun faiga que los medios públicos tengan, igual que l’Executivu de Javier Fernández, los díes cuntaos”.

Loading Facebook Comments ...