La XDLA critica lo asocedío n’Avilés

La XDLA critica lo asocedío n’Avilés
07 20:22 2018 Imprimir

Nuna nota de prensa asoleyada esti miércoles, la Xunta pola Defensa de la Llingua (XDLA) critica lo asocedío n’Avilés, onde los problemes cola ordenanza d’usu del asturianu vuelven a recordar la necesidá de la oficialización del idioma. Pa la XDLA “les postures contraries a la normalización siempre van escudase nes lleis pa negar derechos, anque nel casu avilesín nada impidiera siguir alantre cola aprobación”.

La noticia de que’l Conceyu d’Avilés nun va siguir alantre cola tramitación d’una ordenanza d’usu del asturianu depués d’un informe desfavorable de los sos servicios xurídicos nun fai más que recordar la necesidá d’un marcu llegal que garantice polítiques actives y clares en favor de la normalización del idioma. Esi marcu nel Estáu español nun ye otru que la oficialidá.

De toles maneres, la Xunta pola atalanta que puen facese polítiques más modestes de promoción del asturianu, como les que se vienen faciendo hasta agora nos conceyos y na Alministración autonómica, ensin que los enemigos acérrimes de l’ampliación de derechos pa la ciudadanía tengan que tachales d’illegales, como ye’l casu de los autores d’esi informe xurídicu d’Avilés: “La conclusión d’esi documentu fadríanos entrar nun bucle ensin solución: nun se pue promocionar l’asturianu porque, si se tomen midíes normalizadores pa favorecer que se fale, tamos faciéndolo casi oficial. Los que piensen asina son depués los mesmos que nieguen la oficialidá hasta que l’asturianu nun s’use con normalidá. Evidentemente, nun tien nengún sofitu xurídicu pensar qu’aprobar unes ordenances d’usu como les que yá tán aprobaes n’otros conceyos dende va años (Villaviciosa, L.lena, Cangas del Narcea, Xixón…) ye lo mesmo que facer l’asturianu oficial. Trátase de midíes de promoción avalaes pola Llei d’Usu y Promoción del Asturianu de 1998 que fundamenten, por exemplu, la existencia dende hai muncho nel Conceyu d’Avilés d’un departamentu municipal pa esi fin, la Estaya de la Llingua”.

Pala Xunta demuéstrase que’l marcu actual, la Llei d’Usu, ye insuficiente pa garantizar que nun haya interpretaciones xurídiques, por mui torpes o poco fundamentaes que seyan, qu’avalen la inacción de los nuestros responsables políticos: “La oficialidá ye l’únicu camín que garantiza que los Conceyos puedan actuar con autonomía nuna actividá tan normal como favorecer l’usu de la llingua propia y, por supuestu, pa que la ciudadanía que quiera pueda usar l’asturianu ensin problema”.

Loading Facebook Comments ...