Portada Política La XDLA critica la Comisión pa la “protección” del Asturianu

La XDLA critica la Comisión pa la “protección” del Asturianu

by redacción asturnews
Captura de la Web de la Xunta Pola Defensa de la Llingua

La Xunta pola Defensa de la Llingua Asturiana (XDLA) critica que la comisión d’estudiu sobre l’asturianu na Xunta Xeneral nun va ser permanente y nun va tener capacidá llexislativa y  “que temos falando de protección” a estes altures del sieglu XXI.
Depués de que PSOE, Podemos, Foru, ya IX, a propuesta d’esta cabera formación, decidieren entamar una comisión especial pa la protección y potenciación del  idioma, la Xunta pola Defensa de la Llingua Asturiana (XDLA) amosaba esti día la so opinión sobre la iniciativa, fondamente crítica col fechu de qu’esta comisión d’estudiu nun va ser permanente y nun va tener capacidá llexislativa y con que temos falando de protección a estes altures del sieglu XXI.

Per un llau, como organización comprometida col futuru del asturianu aplauden “toles iniciatives parllamentaries que busquen reconocer el nuestru patrimoniu llingüísticu. Sicasí, pensamos qu’esta comisión llega décades tarde. Tenía más sentíu entamala nel añu 1982, cuando l’autonomía echó a andar, o en 1998, namás aprobase la Llei d’Usu. Y ye que preguntase cómo se pue protexer o potenciar l’idioma nel añu 2015 -ensin esclariar si depués se va llevar alantre lo alcordao- nun tien munchu xacíu, cuando toos sabemos que l’aniciu de too ello tien que venir d’una reforma del Estatutu que recueya la oficialidá. Lo contrario ye poner estorbos al procesu de recuperación llingüística y a una reivindicación social que lleva na cai más de tres décades reclamándolo”.

Amás, na opinión de la Xunta Pola, “esta comisión d’estudiu nun va ser permanente y nun va tener capacidá llexislativa. Tamién se vuelve a les palabres de “protección” y “potenciación”, dando un pasu atrás na “normalización” que la FSA parecía qu’empezaba a asumir (obligada) col cambéu na denominación de la Dirección Xeneral encargada de les cuestiones llingüístiques”.

Na XDLA esperen que la comisión “acabe convirtiéndose nun Conseyu qu’asesore al Parllamentu y al Gobiernu y que tenga dalguna capacidá de decisión o pesu nes midíes qu’hai que tomar pa normalizar l’usu del asturianu na nuestra sociedá”. Con too, dicen nun poder dexar de felicitase “pol consensu algamáu pa echar alantre esta iniciativa, con 31 diputaos a favor d’ella. Agora, esta mayoría tien que tomar nota y apoyar otres iniciatives qu’ayuden a salvaguardar el nuestru patrimoniu llingüísticu, como pue ser la puesta en marcha d’un Plan de Normalización o que se tenga en cuenta la sensibilidá llingüística de los futuros miembros del Conseyu d’Alministración de RTPA, preséu fundamental pa dar un reblagu a les polítiques de normalización nos medios de comunicación”.

P’acabar, na XDLA  nun quieren dexar de referise a l’actitú del PP y de Ciudadanos, “que votaron en contra de la comisión. Yá nun ye que nun quieran dar pasos alantre col asturianu: nin quieren analizar qué se pue facer con ello (porque tar na comisión nun los comprometía a nada). Mesmamente echaron mano d’un argumentu masuñáu y demagóxicu: nun ye una cuestión prioritaria y lo que preocupa ye l’empléu. Esperamos que l’actividá parllamentaria d’estos dos grupos trate de más asuntos que l’empléu nestos cuatro años que falten”. Dende la XDLA entienden que más que prioritario, la supervivencia del nuestru patrimoniu llingüísticu ye dalgo urxente, “porque la UNESCO y otros organismos internacionales lleven años alertando del peligru de muerte que cuerre. Nun sabemos entós a qué hai qu’esperar y cuál sería’l momentu más afayadizu según los 14 diputaos del PP y Ciudadanos ¿Cuándo nun quede nengún falante? Con too, y como muestren les encuestes sociollingüístiques, sabemos que la sociedá ve con simpatía la defensa de la llingua de los güelos y nun ta a favor d’eses actitúes de despreciu de los que, a pesar de les palabres y la sonrisa, quiten la mázcara cuando sal la cuestión y queden retrataos como los principales enemigos de la llingua asturiana”.

Tamién te podria gustar